Nurlan Nyǵmatýlın: Májilistiń jumys aýqymy Prezıdent Joldaýyn iske asyrýǵa baǵyttalǵan

NUR-SULTAN. QazAqparat - Búgin Májilis Spıkeri Nurlan Nyǵmatýlınniń tóraǵalyǵymen ótken jalpy otyrysta depýtattar altynshy sessııaǵa arnalǵan negizgi parlamenttik is-sharalar josparyn bekitti, dep habarlaıdy QazAqparat tilshisi.

Májilis Tóraǵasy Nurlan Nyǵmatýlın atap ótkendeı, aǵymdaǵy sessııa jumysy aýqymdy bolady dep kútilýde.

Komıtetterdiń keńeıtilgen taqyryptyq otyrystarynda, dóńgelek ústelderinde qoǵamnyń ózekti máseleleri qaralady. Olardyń qatarynda ekologııa, agroónerkásiptik keshen, ǵylym, halyqqa qyzmet kórsetýdi jetildirý jáne t.b máseleler bar.

Aldyńǵy sessııadaǵydaı «Úkimet saǵattary» mınıstrdiń jalpy saladaǵy ahýal týraly emes, naqty bir memlekettik baǵdarlamanyń oryndalýy týraly esebimen jańartylǵan nysanda ótkiziletin bolady.

Azamattarǵa quqyqtyq kómek kórsetýge boıynsha da parlamenttik tyńdaýlar josparlanǵan.

Barlyq is-sharalar sanıtarlyq-epıdemıologııalyq talaptardy saqtaı otyryp uıymdastyrylady.

Májilis Tóraǵasy depýtattardyń jumys aýqymy, eń aldymen Memleket Basshysy Joldaýyndaǵy mindetterdi zańnamalyq júzege asyrýǵa baǵyttalatynyn jetkizdi.

«Ózderińiz kórip otyrǵandaı, eldegi qalyptasqan jaǵdaıǵa qaramastan biz osy sessııada ádettegideı kóptegen is-sharalar josparlap otyrmyz. Onyń ishinde, Úkimet saǵattary, parlamenttik tyńdaýlar, ártúrli kezdesýler jáne otyrystar da bar. Olardyń barlyǵynda eń aldymen, ekonomıkalyq-áleýmettik mańyzdy suraqtar talqylanatyn bolady. Árıne, is-sharalardy uıymdastyrý, ótkizý formatynda ózgerister bolsa da, ol jumys sapasyna eshqandaı áser etpeıdi. Ol jaǵynan ótken sessııadan da tájirıbemiz bar»,– dedi Májilis Tóraǵasy.

Nurlan Nyǵmatýlın sonymen birge depýtattar jumysynyń ashyqtyǵyna jáne barlyq aqparattyq múmkindikterdi paıdalaný qajettigine basa nazar aýdardy.