Nurlan Nyǵmatýlın Májilistiń sessııasyn qorytyndylady
NUR-SULTAN. QazAqparat - Búgin altynshy shaqyrylǵan Parlament Májilisiniń tórtinshi sessııasynyń sońǵy jalpy otyrysy ótti. Osyǵan oraı, Májilis tóraǵasy Nurlan Nyǵmatýlın ótken sessııa jumysyn qorytyndylady, dep habarlaıdy QazAqparat.
«Búgin biz tórtinshi sessııadaǵy Májilistiń sońǵy jalpy otyrysyn ótkizip otyrmyz. Ózderińiz bilesizder, bul sessııa Májilis tarıhyndaǵy mańyzdy kezeńderdiń biri boldy. Osyǵan oraı elimizge, halqymyzǵa qajetti kóptegen zańdar qabyldandy, kóptegen parlamenttik sharalar ótti. Olardyń barlyǵy eń aldymen Elbasynyń áleýmettik-ekonomıkalyq strategııalyq mindetterin oryndaýǵa arnaldy. Sonymen birge, Memleket basshysy Qasym-Jomart Toqaevtyń alǵa qoıǵan tapsyrmalaryn júzege asyrýǵa da baǵyttaldy. Bul depýtattyq korpýstyń Úkimetpen, tıisti memlekettik organdarmen jáne qoǵamdyq uıymdarmen birlese atqarǵan jumysynyń nátıjesi deýge bolady», - dedi N. Nyǵmatýlın.
Májilis tóraǵasy osy sessııa barysynda 41 jalpy otyrys ótkenin atap ótti. Bul kezeńde palatanyń qaraýynda 110 zań jobasy boldy, onyń ishinde 81-i maquldanyp, Senatqa baǵyttaldy. Sonymen birge, 13 «Úkimet saǵaty» men 2 parlamenttik tyńdaý, 14 kóshpeli otyrys jáne 4 halyqaralyq konferentsııa uıymdastyryldy.
«Sessııa aıaqtalyp jatyr, alaıda bizde saılaýshylarmen kezdesý úshin óńirlerge saparlar josparlanǵan. Osy kezdesýler barysynda aıtylǵan usynystardy bizdiń jumysta eskerý kerek», - dedi Nurlan Nyǵmatýlın.
Eske sala keteıik, Parlamenttiń tórtinshi sessııasy 2019 jylǵy 5 shildege deıin uzartyldy.
Atap aıtqanda, mańyzdy sharalardy iske asyrý úshin 2019-2021 jyldarǵa arnalǵan respýblıkalyq bıýdjet týraly zańǵa ózgeristerdi engizý qajet boldy. Osyǵan baılanysty bıýdjetke engiziletin ózgeristerdi qarastyrý úshin Parlament sessııasynyń jumys merzimi uzartyldy.
