Nurlan Nyǵmatýlın: Májilis memleketaralyq standarttaý týraly kelisimdi qaraıdy
NUR-SULTAN. QazAqparat - Búgin palata spıkeri Nurlan Nyǵmatýlınniń tóraǵalyǵymen Májilis bıýrosy ótip, onda aldaǵy jalpy otyrystyń kún tártibi naqtylandy, dep habarlaıdy QazAqparat Májilistiń baspasóz qyzmetine silteme jasap.
Bıýro otyrysynda depýtattar qaraýyna birqatar ratıfıkatsııalyq zań jobalary usynyldy. Atap aıtqanda, «Memleketaralyq standarttaý jónindegi qujattardy taratý týraly kelisimdi ratıfıkatsııalaý týraly» zań jobasy. Bul Kelisimdi qabyldaý memleketaralyq standarttaý boıynsha qoldanylatyn qujattardyń durystyǵy men ózektiligin, TMD-qa qatysýshy memleketterdiń ulttyq standarttaý júıeleriniń shyǵyndaryn jabýdy qamtamasyz etedi.
Aldaǵy jalpy otyrysta depýtattar TMD qatysýshy memleketterdiń bas bostandyǵynan aıyrýmen baılanysty emes jazalardy oryndaýdy berý týraly konventsııany ratıfıkatsııalaý, sondaı-aq, «2011 jylǵy 22 maýsymdaǵy Keden odaǵyna múshe memleketterdiń keden qyzmetteriniń Birikken alqasy týraly shartqa ózgerister engizý týraly hattamany ratıfıkatsııalaý týraly» zań jobalaryn qaraıdy.
