Nurlan Nyǵmatýlın Májilis Bıýrosynyń otyrysyn ótkizdi
Aldaǵy sársenbide Májilis depýtattary birqatar ratıfıkatsııalyq zań jobalaryn qarap, talqylaıtyn bolady.
Onyń qatarynda Shanhaı Yntymaqtastyq Uıymynyń Ekstremızmge qarsy is-qımyl jónindegi konventsııasyn ratıfıkatsııalaý týraly zań jobasy uıymǵa qatysýshy memleketterdiń ekstremızmge qarsy is-qımyl yntymaqtastyǵynyń tıimdiligin arttyrýǵa baǵyttalǵan. Bul Konventsııa eki jyl buryn Nur-Sultanda jasalǵan.
Osy kúni depýtattar nazaryna tunshyqtyratyn, ýly nemese basqa da uqsas gazdar men bakterıologııalyq quraldardy soǵysta qoldanýǵa tyıym salý týraly hattamany (Jeneva, 1925 jylǵy 17 maýsym) ratıfıkatsııalaýǵa arnalǵan qujat usynylady. Qazirgi ýaqytta 140 memleket Jeneva hattamasynyń qatysýshysy sanalady. Zań jobasy Qazaqstannyń Jeneva hattamasyna resmı qosylýy úshin múmkindik jasaýǵa baǵyttalǵan.
Aldaǵy jalpy otyrysta Palata Tájikstan, Qyrǵyzstan, Qazaqstan jáne Ismaılıtter Imamaty arasyndaǵy Ortalyq Azııa Ýnıversıtetin qurý jónindegi shartqa hattamany, sonymen birge, Reseımen «Baıqońyr» ǵarysh aılaǵynan ushyrý kezinde tasymaldaǵysh zymyrandardan bólinetin bólikterdiń qulaý aýdany retinde Qazaqstan aýmaǵyndaǵy jer ýchaskesin berý jáne paıdalaný sharttary týraly úkimetaralyq kelisimdi ratıfıkatsııalaýǵa qatysty zań jobalarymen jumysty odan ári jalǵastyrady dep kútilýde.
