Nurlan Nyǵmatýlın Marokko elshisin qabyldady
ASTANA. QazAqparat - Májilis Tóraǵasy Nurlan Nyǵmatýlın Marokko Koroldiginiń Qazaqstandaǵy Tótenshe jáne Ókiletti elshisi Abdeljalıl Saýbrıdi qabyldady, dep habarlaıdy tómengi Palatanyń baspasóz qyzmeti.
Taraptar eki el arasyndaǵy yntymaqtastyqty damytýdyń ózekti suraqtaryn talqylady.
Májilis Tóraǵasy Marokko Qazaqstannyń Soltústik Afrıkadaǵy mańyzdy áriptesi ekenin aıtty.
Ótken jyly eki el arasynda dıplomatııalyq qatynastyń ornaǵanyna 25 jyl toldy. Osy ýaqyttar ishinde bizdiń elderimiz arasyndaǵy baılanys syndarly damyp keledi.
Májilis Spıkeriniń pikirinshe, BUU, IYU, Afrıka Odaǵy uıymdary deńgeıinde halyqaralyq ózekti máseleler boıynsha bizdiń elderimizdiń ustanymy óte jaqyn. Osy rette N. Nyǵmatýlın Qazaqstan Prezıdenti Nursultan Nazarbaevtyń halyqaralyq qaqtyǵystardy retteýde elder arasyndaǵy ózara senim men syndarly únqatysýǵa basa nazar aýdaratyndyǵynyń mańyzdylyǵyna toqtaldy.
Odan ári kezdesý ıeleri saýda-ekonomıkalyq, mádenı-gýmanıtarlyq áriptestik jaıyn talqylady.
N. Nyǵmatýlınniń aıtýynsha, bizdiń elderimiz arasynda kólik-logıstıka salasyn paıdalanýdyń áleýeti zor. Sondaı-aq, Eýrazııalyq Ekonomıkalyq Odaq aıasynda ózara is-qımyldy tereńdetýdiń múmkindigi mol.
Sonymen birge, mashına jasaý, aýylsharýashylyǵy, «jasyl energetıka» salalarynda yntymaqtastyqty kúsheıtý basym baǵyttardyń biri bolyp tabylady.
Óz kezeginde Abdeljalıl Saýbrı bizdiń elderimiz arasyndaǵy saıası ári dıplomatııalyq qatynastyń óte joǵary deńgeıde ekenin jáne Marokko ózara yqpaldastyqty odan ári tereńdetýge yntaly ekenin jetkizdi.
Taraptar parlamentaralyq baılanys jaıyn sóz etkende yntymaqtastyq jónindegi top, sondaı-aq, beıindi komıtetter tóńireginde áriptestik Qazaqstan men Marokko arasyndaǵy ózara is-qımyldy jan-jaqty damytýǵa zor yqpal etetinin aıtty.
