Nurlan Nyǵmatýlın: Qyrǵyzstanmen jańa kelisim zańsyz kóshi-qondy azaıtady

NUR-SULTAN. QazAqparat - Búgin Májilis spıkeri Nurlan Nyǵmatýlınniń tóraǵalyǵymen ótken jalpy otyrysta depýtattar Qazaqstan men Qyrǵyz Úkimetteri arasyndaǵy kóshi-qon salasyndaǵy yntymaqtastyq týraly kelisimdi ratıfıkatsııalaý týraly zań jobasyn maquldady, dep habarlaıdy QazAqparat.

Nurlan Nyǵmatýlın zań jobasyn talqylaý kezinde osydan bir apta buryn Qyrǵyz Respýblıkasynyń Prezıdenti elimizge memlekettik saparmen kelip, qos memleket basshylarynyń eki eldiń aýmaǵy arqyly azamattar men kólik quraldarynyń erkin qozǵalysy men tranzıti úshin kelisilgen sharalar qabyldaýdyń mańyzyn aıtqanyn atap ótti.

- Bul zań jobasy eki el úshin de óte mańyzdy. Sebebi, bizdiń memleketterimizdiń ózara áriptestigi barlyq salada óte tyǵyz. Mysaly, byltyr Qyrǵyzstannan bizdiń elimizge 250 myń azamat kelgen bolsa, al, Qyrǵyz eline Qazaqstannan 175 myń azamat barǵan. Máseleni naqtylap aıtqanda, elderimiz arasyndaǵy kóshi-qon máselesin durys retteý úshin osy Kelisimdi ratıfıkatsııalap otyrmyz, - dedi Májilis Tóraǵasy.

Palata spıkeriniń aıtýynsha, atalǵan kelisimdi ratıfıkatsııalaý zańsyz kóshi-qonǵa qarsy kúreste eki el yntymaqtastyǵynyń, kóshi-qon protsesterin retteýdiń, qos azamattyq faktileriniń jolyn kesýdiń tıimdiligin arttyrýǵa múmkindik beredi.