Nurlan Nyǵmatýlın Qazaqstandaǵy Belarýs elshisin qabyldady
ASTANA. QazAqparat - Májilis Tóraǵasy Nurlan Nyǵmatýlın Belarýs Respýblıkasynyń Qazaqstandaǵy Tótenshe jáne Ókiletti elshisi Anatolıı Nıchkasovpen kezdesti.
Júzdesý barysynda ekijaqty qarym-qatynasty damytýdyń ózekti máseleleri talqylandy, dep habarlaıdy Májilistiń baspasóz qyzmeti.
N.Nyǵmatýlın atap ótkendeı, «Belarýs Respýblıkasy Qazaqstannyń mańyzdy saıası jáne saýda-ekonomıkalyq áriptesi bolyp tabylady. Qos memlekettiń ózara baılanysy búgingi kúni dostyq-baýyrmaldyq deńgeıge jetken. Osy jolda eki eldiń Prezıdentteri Nursultan Ábishuly men Aleksandar Grıgorevıchtiń róli aıryqsha. Bıyl bizdiń elderimiz arasynda dıplomatııalyq qatynastyń ornaǵanyna 25 jyl tolady. Osy ýaqyt ishinde elder kóshbasshylarynyń ózara túsinistik pen senimge negizdelgen birlesken jumysy nátıjesinde 70-ten astam ekijaqty qujattarǵa qol qoıyldy. Sondaı-aq, Qazaqstan TMD aıasynda Belorýssııanyń negizgi saýda áriptesteriniń úshtigine kiredi».
Májilis Tóraǵasy ótken jyly 2017-2018 jyldarǵa arnalǵan birlesken is-sharalar josparynyń jasalǵanyn aıta kelip, ózara tıimdi áriptestiktiń aldaǵy ýaqytta barlyq salada syndarly jalǵasyn tabatyndyǵyn sóz etti.
Palata Spıkeri Qazaqstan Prezıdentiniń memlekettik basqarý júıesin jańǵyrtýǵa qatysty úndeýine de erekshe nazar aýdaryp, Elbasy bastamalary memlekettik organdardyń qoǵam aldyndaǵy jaýapkershiligin kúsheıtýge baǵyttalǵanyna toqtaldy.
Óz kezeginde elshi Belarýs memleketiniń Qazaqstanda júzege asyrylyp jatqan baǵdarlamalarǵa muqııat nazar aýdaratynyn aıtty. "Bizge Qazaqstan Prezıdenti Nursultan Nazarbaevtyń tıimdi, turaqty, zamanaýı basqarý júıesin qurý jolyndaǵy reformalary úlgi bolarlyq",-dedi ol.
Odan ári kezdesý ıeleri parlamentaralyq yntymaqtastyqty odan ári tereńdetýdiń basym baǵyttaryna nazar aýdardy.
