Nurlan Nyǵmatýlın Qatarda eki jaqty kezdesýler ótkizdi
NUR-SULTAN. QazAqparat - Májilis Tóraǵasy Nurlan Nyǵmatýlın Qatarda ótip jatqan Parlamentaralyq Odaqtyń 140-shy Assambleıasynyń qatysýshylarymen parlamentaralyq áriptestikti damytý máselelerin talqylady. Bul týraly búgin Májilistiń baspasóz qyzmeti habarlady.
Parlamentaralyq odaqtyń tóraǵasy Gabrıela Kýevas Barronmen áńgime barysynda Qazaqstan Parlamenti atalǵan uıymmen yntymaqtastyqty odan ári nyǵaıtýǵa yntaly ekeni aıtyldy.
Májilis tóraǵasynyń pikirinshe, búgingi kúni álemniń 178 elinen Parlament ókilderin biriktiretin parlamentaralyq Odaq zańnamalyq tájirıbe almasý úshin jáne quqyq qoldaný tájirıbesinde qajetti dıalog alańy.
Nurlan Nyǵmatýlın Qatar Konsýltatıvtik Keńesiniń Basshysy Ahmad ben Abdalla ben Zaıd Al Mahmýdpen kezdesý barysynda Qatar Memleketi Qazaqstannyń mańyzdy seriktesi ekenin, Elbasymyz Nursultan Nazarbaev negizin qalaǵan bizdiń saıası baǵytymyz odan ári jalǵasatynyn jáne memleketterimizdiń ózara baılanysy ári qaraı tereńdeı beretinin aıtty. Májilis Spıkeri atap ótkendeı, eki eldiń Parlament ókilderiniń arasyndaǵy baılanystardy tereńdetý yntymaqtastyq toptary men tıisti komıtetterdiń ózara kezdesýleri arqyly jalǵaspaq.
Al, Qytaı Halyq Respýblıkasy Búkilqytaılyq halyq ókilderi Jınalysy Turaqty Komıteti tóraǵasynyń orynbasary Shen ıÝe ıÝe-men áńgimelesý barysynda Májilis Tóraǵasy «Nurly jol» baǵdarlamasynyń «Bir beldeý, bir jol» jobasy boıynsha birlesken jumysynyń nátıjelerine nazar aýdardy. Bul «Qorǵas» qurǵaq porty, Aqtaý porty, «Qazaqstan - Túrikmenstan - Iran» jańa temirjol dálizi; «Batys Eýropa - Batys Qytaı» halyqaralyq tranzıttik dálizi. Taraptar ortaq mindetterdi sheshý jolynda qazaqstandyq jáne qytaılyq Parlament ókilderiniń eki jaqty jáne halyqaralyq parlamenttik uıymdar sheńberinde yntymaqtastyǵy odan ári arta beretinine senim bildirdi.
Nurlan Nyǵmatýlınniń Belgııa Parlamenti Ókilder Palatasynyń Tóraǵasy Zıgfrıd Brakemen kezdesýinde qoljetkizilgen parlamentaralyq ózara is-qımyldy odan ári damytý týraly aıtyldy.
Májilis Spıkeri atap ótkendeı, jyl saıyn ótkiziletin «Qazaqstan Respýblıkasy - Eýropalyq Odaq» parlamenttik yntymaqtastyq komıtetiniń otyrystary parlamentshilerge ózekti máselelerdiń keń aýqymy boıynsha pikir almasýǵa, sondaı-aq zańnamalyq qyzmettiń tájirıbesin zerdeleýge múmkindik beredi.
Barlyq kezdesýlerde Palata Spıkeri Nurlan Nyǵmatýlın áriptesterin aǵymdaǵy jyldyń 23-24 qyrkúıek aralyǵynda Nur-Sultan qalasynda ótetin «Úlken Eýrazııa: Dıalog. Senim. Seriktestik» degen Eýrazııa elderi parlamentteri Spıkerleriniń IV Keńesine qatysýǵa shaqyrdy.
Parlamentaralyq Odaqtyń 140-shy Assambleıasy aıasynda Májilis tóraǵasy Armenııa, Bangladesh, Vetnam, Iran, Makedonııa, Malta jáne Túrkııalyq áriptesterimen kelissózder júrgizdi.
- Osy Qatar memleketinde ótken barlyq kezdesýlerde Parlament ókilderi qyrkúıek aıynda Nur-Sultan qalasynda ótetin Eýrazııa elderi Parlamentteri spıkerleriniń tórtinshi Keńesine erekshe yqylas kórsetip otyr. Bul - eń aldymen, Elbasymyz Nursultan Ábishuly Nazarbaevtyń halyqaralyq bedeli jáne álemdik saıasattaǵy róli óte joǵary ekeniniń taǵy bir naqty kórsetkishi, taǵy bir naqty dáleli dep sanaımyz, - Nurlan Nyǵmatýlın kezdesý qorytyndysynda.
