Nurlan Nyǵmatýlın halyqaralyq baıqaýshylarmen kezdesti

NUR-SULTAN. QazAqparat - Búgin Májilis tóraǵasy Nurlan Nyǵmatýlın Chehııa Parlamenti Depýtattar palatasy tóraǵasynyń orynbasary Voıteh Fılıppen kezdesti. Mártebeli meıman elimizge Qazaqstan Respýblıkasy Parlamenti Májilisi jáne máslıhattary saılaýyna halyqaralyq baıqaýshy retinde kelgen, dep habarlaıdy QazAqparat tómengi palatanyń baspasóz qyzmetine silteme jasap.

Kezdesý barysynda Májilis tóraǵasy elimizde halyqaralyq talaptarǵa sáıkes ashyq ta ádil saılaý ótkizý úshin barlyq qajetti jaǵdaılar jasalǵanyn atap ótti. Onyń ishinde, epıdemııaǵa qarsy sharalar da qarastyrylǵan.

Sonymen qatar, Nurlan Nyǵmatýlın Májilis depýtattyǵyna kandıdattar Qazaqstannyń halyq partııasy, «Nur Otan», «Aýyl», «Aq jol» jáne «Adal» partııalarynan qatysyp jatqanyn aıtty.

Májilis tóraǵasynyń pikirinshe, bul aldaǵy saılaýdyń básekege qabilettiligin kórsetedi. Nurlan Nyǵmatýlın Qazaqstannyń saılaý zańnamasyna sáıkes barlyq partııalyq tizimderde genderlik jáne jas mólsherine qatysty kvotanyń eskerilgenine nazar aýdardy. Sondaı-aq, eldiń saıası júıesi jańǵyrtylyp, sonyń nátıjesinde saıası partııalardy tirkeý tártibi jeńildetilip, parlamenttik oppozıtsııa ınstıtýty engizilip jatqany týraly aıtyldy.

Óz kezeginde, Chehııa Parlamenti Depýtattar palatasy tóraǵasynyń orynbasary Voıteh Fılıp Qazaqstandaǵy saılaý naýqanyna daıyndyqqa qatysty pikirimen bólisti.

Osy ýaqytqa deıin Qazaqstanda birneshe saılaýǵa qatysqanyn alǵa tartqan halyqaralyq baıqaýshy bul joly da saılaýdyń demokratııalyq talaptarǵa saı, joǵary deńgeıde ótetinine senim bildirdi. Sonymen birge, eki el arasyndaǵy yntymaqtastyq barlyq salada qarqyndy damyp kele jatqanyn aıtyp, oǵan qazirgi pandemııa kezinde de ekonomıkalyq-saıası baılanystardyń belsendi jalǵasýy naqty dálel ekenin atap ótti.

Kezdesý barysynda taraptar Qazaqstan men Chehııa arasyndaǵy yntymaqtastyq máselelerin talqylap, onyń damýyna eki eldiń parlamentshileri de eleýli úles qosqanyna toqtaldy.