Nurlan Nyǵmatýlın: Grýzııa Prezıdentiniń sapary ózara yntymaqtastyqqa tyń serpin beredi

ASTANA. QazAqparat - Májilis tóraǵasy Nurlan Nyǵmatýlın Qazastanǵa resmı saparmen kelgen Grýzııa Prezıdenti Gıorgıı Margvelashvılımen kezdesti, dep habarlaıdy QazAqparat palatanyń baspasóz qyzmetine silteme jasap.

EKSPO kórmesinde Grýzııa Ulttyq kúniniń saltanatty ashylýynan keıin birden Májiliske kelgen mártebeli meımanǵa N. Nyǵmatýlın halyqaralyq kórmege kórsetken qoldaýy úshin shynaıy alǵysyn jetkizdi.

Bıyl eki el arasynda dıplomatııalyq qarym-qatynastyń ornaǵanyna 25 jyl tolady. Osy ýaqyttar aralyǵynda qos memleket  arasynda syndarly baılanys ornap, ol jyl saıyn tereńdep keledi.

Májilis spıkeri atap ótkendeı, Grýzııa Prezıdentiniń bul jolǵy sapary ózara yntymaqtastyqqa tyń serpin beretin bolady.

N. Nyǵmatýlın Qazaqstan Prezıdenti Nursultan Nazarbaev Grýzııamen tatý kórshilik, dostyq, tarıhı tamyrlastyq aıasynda barlyq saladaǵy yntymaqtastyqty tereńdetýge erekshe nazar aýdaratynan alǵa tarta kelip, saıası, saýda-ekonomıkalyq, mádenı-gýmanıtarlyq salalardaǵy turaqty damý úderisin sóz etti.  

Ekonomıkalyq yqpaldastyq tóńireginde palata tóraǵasy ótken jyly eki el arasyndaǵy syrtqy saýda aınalymynyń 41 mln. dollardy quraǵanyn aıtyp, eki el áleýetin eskere otyryp, saýda aınalymyn arttyrý qajettigine toqtaldy.

Sonymen birge, Májilis tóraǵasy Grýzııanyń Adjarııa men Mańǵystaý oblysy arasynda tikeleı ekonomıkalyq baılanystar ornatý bastamasynyń mańyzdylyǵyna toqtalyp, Májilis eki eldiń tıimdi yntymaqtastyǵyn tıisti zańnamalyq qujattarmen qoldaýǵa daıyn ekenin bildirdi.

Óz kezeginde Grýzııa Prezıdenti Qazaqstanǵa jetken sátten bastap kórsetilgen qonaqjaılylyq úshin sheksiz rızashylyq bildirip, eki el arasyndaǵy yntymaqtastyqty kúsheıtýdiń múmkindigi zor ekenin atap ótti. Gıorgıı Margvelashvılıdiń pikirinshe, osy jolda parlamentaralyq áriptestiktiń róli óte zor.

Aıta keteıik, Parlament Májilisinde depýtat M. Aısına jetekshilik etetin Grýzııamen yntymaqtastyq jónindegi parlamentaralyq top jumys isteıdi.