Nurlan Nyǵmatýlın Eýropa jáne Amerıka isteri jónindegi brıtandyq mınıstrdi qabyldady

NUR-SULTAN. QazAqparat - Búgin Májiliste Palata Spıkeri Nurlan Nyǵmatýlın Ulybrıtanııa Syrtqy ister mınıstrliginiń Eýropa jáne Amerıka isteri jónindegi memlekettik mınıstri, Qaýymdar palatasynyń depýtaty Alan Dankanmen kezdesti, dep habarlaıdy QazAqparat Májilistiń baspasóz qyzmetine silteme jasap.

Taraptar parlamentaralyq baılanystardy nyǵaıtýǵa baǵyttalǵan qazaqstandyq jáne brıtandyq yntymaqtastyqtyń ózekti máselelerin talqylady.

Nurlan Nyǵmatýlın Ulybrıtanııa - elimizdiń Eýropadaǵy strategııalyq áriptesi ekenin jáne Qazaqstannyń Tuńǵysh Prezıdenti, Elbasy Nursultan Nazarbaev pen Ulybrıtanııa basshylyǵy arasyndaǵy tıimdi baılanys ekijaqty yntymaqtastyqty damytýǵa serpin bergenin atap ótti. Sondaı-aq, Májilis Tóraǵasy Qazaqstannyń syrtqy saıasatynda ózgeris bolmaıtynyn jáne Elbasy bastamashy bolǵan barlyq memlekettik baǵdarlamalar odan ári iske asyryla beretinine nazar aýdardy.

Óz kezeginde, Alan Dankan Qazaqstandy Ortalyq Azııa aımaǵy úshin mańyzdy el dep, Ulybrıtanııa bizdiń elimizde bolyp jatqan saıası úrdisterdiń birqalypty bolýyn qoldaıtynyn atap ótti.

Brıtandyq saıasatkerdiń aıtýynsha, turaqtylyq pen sabaqtastyq halyqaralyq arenada Qazaqstan bedeliniń mańyzdy quramdas bóligi bolyp tabylady.

Qazaqstandyq jáne ulybrıtanııalyq parlamentaralyq yntymaqtastyq týraly áńgime barysynda taraptar ony júıeli negizde nyǵaıtýǵa qyzyǵýshylyq bildirdi.

Májilis Tóraǵasynyń pikirinshe, parlamenaralyq baılanysty nyǵaıtýǵa brıtandyq Parlament ókilderiniń aǵymdaǵy jylǵy 23-24 qyrkúıekte Elordamyz Nur-Sultan qalasynda «Úlken Eýrazııa: Dıalog. Senim. Seriktestik» taqyrybynda ótetin Eýrazııa elderi parlamentteri tóraǵalarynyń Tórtinshi keńesine qatysýy múmkindik beretin bolady.

Forýmǵa shaqyrý úshin alǵys bildirgen Alan Dankan konferentsııa taqyryby Qazaqstan men Ulybrıtanııanyń búgingi qarym-qatynastarynyń sıpatyn beıneleıtinin atap ótti.