Nurlan Nyǵmatýlın eski lıftiler kóńil-kúıge qalaı áser etetinin aıtty
ASTANA. QazAqparat - Parlament Májilisiniń depýtattary turǵyn úı keshenderindegi tozyǵy jetken lıftiler máselesin kóterdi, dep habarlaıdy QazAqparat tilshisi.
«Elimiz boıynsha lıftilermen jabdyqtalǵan kópqabatty turǵyn úıler sany 8,5 myńǵa jetken nemese 23,5 myń lıft bar. Olardyń ishinde 40 paıyzy jumys istemeıdi. Mysaly, Semeıde 127 lıftini aýystyrý qajettigi bar. Olar 30 jyldan astam ýaqyt boıy paıdalanylyp keledi», - dedi depýtat Vasılıı Oleınık Májilistiń jalpy otyrysynda.
Onyń atap ótýinshe, Oraldaǵy 375 lıftiniń 109-yn aýystyrý kerek, al Sátbaev qalasynda 80 paıyzy isten shyqqan. Sonymen qatar Almatyda jóndeýdi jáne aýystyrýdy qajet etetin - 1900 lıft, Pavlodar oblysynda -1500, Qaraǵandy oblysynda 736 lıft bar eken. Jalpy, elimiz boıynsha 6 myńnan astam lıftiniń paıdalaný merzimi asyp ketken.
Lıftilerdiń nashar tehnıkalyq jaǵdaıy adamdardyń ómiri men densaýlyǵyna táýekel týdyratynyna toqtalǵan depýtat: «Osy oraıda, ókiletti organdar tarapynan baqylaýdy kúsheıtý kerek», - dedi.
Óz kezeginde Parlament Májilisiniń tóraǵasy Nurlan Nyǵmatýlın kóterilip otyrǵan máseleniń ózektiligine nazar aýdardy.
«Kez kelgen ákim kezdesýler barysynda jaqsy jumys isteıtindigi jóninde keýdesin qaqqanyna qaramastan, qarapaıym azamat keshke jumystan qaıtqanda, 9-ynshy qabatqa jaıaý kóterilip bara jatyp óz baǵasyn beredi. Meıram Qudaıbergenuly (depýtat Meıram Pishembaev - avt) Qazaqstan Mashına jasaýshylar odaǵyna basshylyq etedi. Atalǵan salaǵa qajetti arnaıy qarjy bólinýde. Lıft sharýashylyǵy boıynsha shaǵyn zaýytty ashýdyń ýaqyty jetken shyǵar. Tek bir qalada jumys istemeıtin 1900 lıft bar. Atap aıtqanda, bul ınfraqurylymnyń barlyǵy halyqtyń áleýmettik kóńil-kúıine tikeleı áser etedi ǵoı», - dedi Nurlan Nyǵmatýlın.
Budan buryn habarlanǵandaı, Qazaqstanda lıft qyzmeti jónindegi ulttyq standart barlyq kompanııalarǵa mindettelýi múmkin.
