Nurlan Nyǵmatýlın eńbek salasyndaǵy jetistikterdi atady
ASTANA. QazAqparat - Búgin Májiliste ótken jumyspen qamtý máselelerine arnalǵan parlamenttik tyńdaý barysynda palata tóraǵasy Nurlan Nyǵmatýlın salada oryn alǵan ózgeristerdi atady, dep habarlaıdy QazAqparat tilshisi.
«Ózderińizge belgili, egemendik alǵan alǵashqy jyldar ońaı bolǵan joq. Sharýashylyq boıynsha barlyq sala toqtady, fabrıkalar men zaýyttar jabylyp, kóptegen azamattarymyz jumyssyz qaldy. Zeınetaqy, jalaqy jáne basqa da áleýmettik járdemaqylar berilmedi. Biraq ta Elbasy saıasatynyń arqasynda az ýaqyttyń ishinde osy qıyn kezeńderden aman-esen óttik. Qazir elimizde erkin ekonomıka qurylyp, ol barlyq salaǵa oń serpin berdi. Osy ýaqyttyń ishinde eki mıllıonnan astam jańa jumys orny qurylyp, ortasha jalaqy 17 esege deıin ósti. Bul bizdiń qol jetken eń úlken tabastarymyzdyń biri dep sanaımyz. Osy jetistikterimizdi saqtap, odan ári arttyrý úshin Prezıdent «Qazaqstan-2050» strategııasynda, dástúrli Joldaýlarynda, basqa da áleýmettik bastamalarda eńbekpen qamtamasyz etýdiń naqty joldaryn kórsetip keledi», - dep toqtaldy N. Nyǵmatýlın.
Osy oraıda ol bul baǵytta 2011-2016 jyldarda «Jumyspen qamtý jol kartasy» júzege asyrylǵanyn eske salyp ótti. Nátıjesinde, bes jylda 800 myńnan astam adam jumysqa ornalasty. Al byltyrdan beri elimizde «Nátıjeli jumyspen qamtýdy jáne jappaı kásipkerlikti damytý» baǵdarlamasy bastaldy.
«2017 -2021 jyldarǵa arnalǵan jumyspen qamtýdyń keshendi jospary respýblıkamyzdyń barlyq aımaqtaryn qamtıdy deýge bolady. Ózderińiz bilesizder, búgingi kúni jumysqa degen suranys óte joǵary. Sol úshin Elbasymyz Nursultan Ábishuly Nazarbaev óziniń árbir tapsyrmasynda jańa kásiporyndardy ashyp, jumys oryndaryn kóbeıtý týraly naqty mindetter qoıyp otyr. Olardy, sapaly zańdarmen qamtamasyz etý - Parlamenttiń negizgi maqsaty. Sondyqtan, osy máselege baılanysty Májiliste kóptegen sharalar atqarylyp jatyr», - dedi Májilis tóraǵasy.
Atap aıtqanda, ótken sessııada Prezıdenttiń «Bes áleýmettik bastamasy» tıisti zańdarmen qamtamasyz etildi. Sonymen birge, «100 naqty qadam» Ult josparyn iske asyrý sheńberinde qabyldanǵan «Eńbek kodeksi» sııaqty negizgi qujatty erekshe atap ótý qajet. Onda jumys berýshi men jumysker arasyndaǵy eńbek qatynastary rettelgen. Al 2016 jyly «Halyqty jumyspen qamtý týraly» jańa Zań qabyldandy. Ol eńbek kórsetkishterin halyqaralyq standarttarǵa sáıkes jasaýǵa jol ashty.
«Bıylǵy jyly Parlament «Jumyspen qamtý jáne kóshi-qon máseleleri boıynsha» zańnamalyq qujatyn da qabyldady.Atalǵan zań jumyspen qamtý qyzmetteriniń júıesin reformalaýdy, Elektrondyq eńbek bırjasyn engizýdi jáne jumysqa ornalastyrý úshin jeke agenttikterdi tartýdy kózdeıdi. Bul aqparattardy biryńǵaı ınternet-resýrstarǵa biriktirýge múmkindik beredi», - dedi N. Nyǵmatýlın.
