Nurlan Nyǵmatýlın: Elbasy jáne Táýelsizdik degen sózder qatar aıtylyp, bir uǵymǵa aınaldy
Konferentsııa QR Parlamenti Májilisiniń tóraǵasy Nurlan Nyǵmatýlınyń baıandamasymen ashyldy.
«Táýelsizdik kóp elder úshin asqaq arman. Bizdiń babalarymyz ǵasyrlar boıy ańsaǵan osy armanynyń oryndalǵanyna bıyl 30 jyl tolyp otyr. Osy 30 jyldyń árbir belesi biz úshin qaıtalanbas tarıh. Al tarıhty árqashan da uly tulǵalar jasaıtyny belgili. Tek uly tulǵalar ǵana jańa memleketti qalyptastyryp, onyń órkenıetin qamtamasyz etetin úlken qadamdar jasaıdy. Mundaı tulǵalar ýaqyt ótken saıyn bıiktep, tek bir ulttyń ǵana emes, búkil álemniń dana, kóregen saıasatkerine aınalady. Dál osyndaı uly tulǵa ol Qazaqstannyń Tuńǵysh Prezıdenti-Elbasy Nursultan Ábishuly Nazarbaev», - dedi Májilis spıkeri.
Onyń aıtýyna qaraǵanda, búginde Elbasy jáne Táýelsizdik degen sózder bir uǵymǵa aınaldy.
«Búginde qazaqstandyqtar egemen elimizdiń keń baıtaq dalasy ǵana emes, sonymen birgen Nursultan Ábishulyndaı danasy bar ekenin maqtanyshpen aıtady. Qazirde Elbasy jáne Táýelsizdik degen sózder qatar aıtylyp, bir uǵymǵa aınaldy.
Barshańyz jaqsy bilesizder, Táýelsizdiktiń alǵashqy jyldary bárimizge ońaı bolǵan joq. 70 jyl boıy bılik júrgizgen Keńes Odaǵy taraǵannan keıin bizdiń halqymyzdyń jaǵdaıy óte aýyr boldy. Sol kezde barlyq óndiris jáne zaýyt, fabrıkalar toqtap, kolhoz, sovhozdar tarap, myńdaǵan azamat jumyssyz qaldy», - degen Nurlan Nyǵmatýlın birneshe aı boıy eńbekaqy, stıpendııa jáne basqa da tólemder berilmegen kezder bolǵanyn eske aldy.
«Bir sózben aıtqanda ekonomıkalyq daǵdarys ornady. Osyndaı aýyr kezeńde táýekel etip, el taǵdyryn qolyna alǵan Elbasymyz óziniń kemeńger basshylyǵymen eliniń senimin erlikpen, abyroımen aqtady. Bolashaqty boljaı biletin kóregen, dana saıasattyń jáne batyl qadamdarynyń arqasynda halqymyzdy barlyq qıyndyqtan aman-esen alyp shyǵyp, bir bıikten bir bıikke jetkizdi», - dedi Májilis tóraǵasy.
