Nurlan Nyǵmatýlın: Elbasy Ózbekstanmen yntymaqtastyqtyń berik negizin qalady
NUR-SULTAN. QazAqparat - Májilis Tóraǵasy Nurlan Nyǵmatýlın Ózbekstanǵa resmı sapary barysynda Olıı Majlısi Zaӊ shyǵarý palatasynyń Spıkeri Nýrdınjon Ismoılovpen kezdesti. Bul týraly QazAqparat Májilistiń baspasóz qyzmetine silteme jasap habarlaıdy.
Búgingi tańda Ózbekstan bizdiń elimizdiń eń jaqyn, eń senimdi dos memleket ekenin aıtqan Májilis Tóraǵasy, Qazaqstannyń Tuńǵysh Prezıdenti Nursultan Nazarbaevtyń osy jyldar ishinde Ózbekstanmen yntymaqtastyqty damytýǵa erekshe nazar aýdaryp otyrǵanyn atap ótti.
«Májilis delegatsııasynyń sapary Ózbekstandaǵy Qazaqstan jylynda atalyp ótýi, strategııalyq áriptestik pen tatý kórshilik qarym-qatynastardyń damyp kele jatqanyn taǵy bir ret dáleldeı túsedi», - dedi Nurlan Nyǵmatýlın.
Óz kezeginde Ózbekstannyń Olıı Majlısi Zaӊ shyǵarý palatasynyń Spıkeri Nýrdınjon Ismoılov Qazaqstannyń Tuńǵysh Prezıdenti Nursultan Nazarbaevtyń tarıhı rólin erekshe nazar aýdardy.
«Qazaqstan álemdegi tarıh pen mádenıetke baı elderdiń biri sanalady. Biz Tuńǵysh Prezıdenti Nursultan Nazarbaevtyń basshylyǵymen jetken Qazaqstannyń tabystaryna qýanyshtymyz. Sizdiń Elbasy búkil ómirin qazaqstandyqatrdyń ıgiligine arnap keledi» - dedi.
Odan ári taraptar Qazaqstan men Ózbekstan arasyndaǵy yntymaqtastyqty damytýǵa Parlament ókilderiniń de zor úles qosyp otyrǵanyna toqtaldy.
Nurlan Nyǵmatýlın tıisti salalyq komıtetter men fraktsııalyq jáne partııalar arasyndaǵy dıalogty nyǵaıtýǵa, yntymaqtastyq tobynyń áleýetin belsendi paıdalanýǵa qyzyǵýshylyq bildirdi.
Osy rette Májilis Tóraǵasy qazirgi ýaqytta Ózbekstan elinde qolǵa alynǵan reformalardy zańdyq turǵydan qamtamasyz etý boıynsha depýtattardyń úlken jumystar atqaryp jatqanyn alǵa tarta kelip, qazaqstandyq áriptesterdiń is- tájirıbelerimen bólisýge daıyn ekendigin jetkizdi.
Sonymen qatar, N.Nyǵmatýlın Olıı Majlısi ótken jyly TMD Parlamentaralyq Assambleıasynyń quramyna kirgenin aıta kelip, parlamentshiler arasyndaǵy baılanystardy arttyrý maqsatynda ózara is-qımyldy nyǵaıtýdyń mańyzdylyǵyna toqtaldy.
Májilis Tóraǵasy Nurlan Nyǵmatýlın Ózbekstannyń Olıı Majlısi Zaӊ shyǵarý palatasynyń Spıkeri Nýrdınjon Ismoılovty aǵymdaǵy jylǵy 23-24 qyrkúıekte Elordamyz Nur-Sultan qalasynda «Úlken Eýrazııa: Dıalog. Senim. Seriktestik» taqyrybynda ótetin Eýrazııa elderi parlamentteri tóraǵalarynyń IV Keńesine qatysýǵa shaqyrdy.
