Nurlan Nyǵmatýlın EQYU Parlamenttik assambleıasynyń tóraǵasymen kezdesti
ASTANA. QazAqparat - Májilis tóraǵasy Nurlan Nyǵmatýlın EQYU Parlamenttik Assambleıasynyń tóraǵasy Krıstın Mýttonenmen kezdesti, dep habarlaıdy QazAqparat Májilistiń baspasóz qyzmetine silteme jasap.
Májilis Tóraǵasy atalǵan kezdesý bizdiń elimizdiń EQYU-ǵa tolyqqandy múshe bolǵanyna 25 jyl tolǵan, sondaı-aq, bizdiń memleketimiz úshin eleýli kezeń - búkil álemdik EKSPO kórmesi aıasynda ótip otyrǵanyn atap ótti.
Osy rette N. Nyǵmatýlın EQYU sııaqty bedeldi uıymnyń EKSPO-ǵa qatysýy kórmeniń mańyzdylyǵyn arttyra túsetinin jetkizdi.
Odan ári kezdesý ıeleri EQYU men Qazaqstan arasyndaǵy yntymaqtastyqtyń ózekti suraqtaryn talqylady.
N. Nyǵmatýlın atap ótkendeı, Qazaqstan men EQYU-nyń ásirese, aımaqtyq qaýipsizdik pen turaqtylyqty nyǵaıtý jolyndaǵy ustanymdary uqsas.
Osy oraıda Májilis Spıkeri ǵalamdyq problemaǵa aınalǵan ekstremızm men terrorızm máselesine jan-jaqty toqtala kelip, Qazaqstan Prezıdenti Nursultan Nazarbaevtyń BUU aıasynda ǵalamdyq kontrterrorlyq jeli qurý týraly bastamasynyń ózektiligine toqtaldy.
Óz kezeginde K. Mýttonen Qazaqstannyń halyqaralyq deńgeıdegi sonyń ishinde, Ýkraına, Sırııa elderine qatysty mańyzdy máselelerdi sheshýde mańyzdy ról atqaryp kele jatqanyn alǵa tarta kelip, bizdiń elimizdiń 25 jyl ishinde jetken jetistikterine óte joǵary baǵa berdi.
Meıman EKSPO kórmesine arqaý bolǵan bolashaq energııasy taqyrybyna da aıryqsha mán berip, Qazaqstannyń jańartylǵan energııa kózderine baılanysty batyl bastamalary ózgelerge úlgi bolatyndyǵyn jetkizdi.
Taraptar EQYU-nyń ekonomıka-ekologııalyq ólshemderi aıasynda qaýipsizdik salasyndaǵy yntymaqtastyqty kúsheıtý jaıyna da basa kóńil bóldi.
Májilis Tóraǵasy meımandy Parlament Májilisiniń qazirgi qyzmeti jaıynda tolyqqandy habardar ete kelip, ózara yqpaldastyqty nyǵaıtýdaǵy Parlament róline toqtaldy.
EQYU PA tóraǵasy Májilis Tóraǵasyn Avstrııaǵa resmı saparmen kelýge shaqyrdy.
