Nurlan Nyǵmatýlın Dúnıejúzilik densaýlyq saqtaý uıymynyń ókilderimen kezdesti

NUR-SULTAN. QazAqparat – Búgin Parlament Májilisiniń Tóraǵasy Nurlan Nyǵmatýlın Dúnıejúzilik densaýlyq saqtaý uıymy Eýropalyq óńirlik bıýrosynyń dırektory Hans Klıýge bastaǵan delegatsııa ókilderimen kezdesti. Bul týraly QazAqparat Májilistiń baspasóz qyzmetine silteme jasap habarlaıdy.

Taraptar DDSU aıasynda densaýlyq saqtaý salasy boıynsha Turaqty damý maqsattaryna jetýdiń, sonyń ishinde, ana men bala ólimin qysqartý, túrli qaterli aýrýlarmen kúrestiń ózekti suraqtaryn talqylady.

Májilis Tóraǵasynyń pikirinshe, halyq densaýlyǵyn qorǵaý álem elderine ortaq másele. Osy jolda Qazaqstan 30 jylǵa jýyq DDSU-men etene yntymaqtastyq ornatyp keledi. Ásirese, alǵashqy medıtsınalyq-sanıtarlyq kómek baǵytynda syndarly qatynas ornaǵan. N. Nyǵmatýlın 2014 jyly Almatyda DDSU-nyń geografııalyq jaǵynan shalǵaıdaǵy medıtsınalyq sanıtarlyq kómek jónindegi keńsesi ashylǵanyn alǵa tarta kelip, 1978 jyly atalǵan kómek boıynsha Almaty Deklaratsııasy Qazaqstanda qabyldanǵanyn eske saldy.Osynyń barlyǵy bizdiń elimizdiń alǵashqy medıtsınalyq-sanıtarlyq kómekti damytý salasyndaǵy turaqty saıasatynyń kórsetkishi. Qazaqstandaǵy Almaty keńsesi jumysynyń nátıjesinde búginde Qazaqstanda, jalpy aımaq kóleminde úzdik tehnologııalar engizilip, densaýlyq saqtaý qyzmetkerleriniń kásibıligin arttyrý qolǵa alynýda.

Májilis Tóraǵasy qazirgi ýaqytta Májilisi qaraýynda búkil qoǵam bolyp talqylap jatqan jańa Densaýlyq Kodeksi boıynsha belsendi jumys atqarylyp jatqanyn aı ta kelip, -búgingi naqty jaǵdaılar men turaqty ózgerister kezeńinde turǵyndardyń densaýlyǵyn kúsheıtý úshin jańa múmkindikterge jol ashýymyz kerek. Densaýlyq máselesine qatysty barlyq suraqtar árqashanda Májilis jumysynyń basym baǵyttarynyń biri,-dedi.

Óz kezeginde Hans Klıýge densaýlyq salasyn ilgerletýde Qazaqstannyń áleýeti men basymdyqtary zor ekenin atap ótti. Meımannyń aıtýynsha, Qazaqstan alǵashqy medıtsınalyq-sanıtarlyq kómek dúnıege kelgen jer deýge bolady. H. Klıýge myrza, bizdiń elimizdiń áleýmettik-ekonomıkalyq tabystaryna tánti ekenin jetkizip, aldaǵy ýaqytta qol qoıylǵan arnaıy kelisim boıynsha densaýlyq salasyna zamanǵak saı jańalyqtar engizý, sonyń ishinde tsıfrlandyrý baǵytynda birlese, belsendi jumys atqaratynyn atap ótti.

N. Nyǵmatýlın DDSU ókiliniń mol tájirıbesi tek Eýropa aımaǵynda ǵana emes, jalpy álem elderin ortaq maqsat jolynda biriktirýge yqpal etetinine senim bildirdi.