Nurlan Nyǵmatýlın: depýtattar qylmystyq kiristerdi jylystatýǵa qarsy kúres týraly zań jobasyn qaraıdy
NUR-SULTAN. QazAqparat - Palata spıkeri Nurlan Nyǵmatýlınniń tóraǵalyǵymen Májilis Bıýrosy ótip, onda aldaǵy jalpy otyrystyń kún tártibi naqtylandy, dep habarlaıdy QazAqparat tómengi palatanyń baspasóz qyzmetine silteme jasap.
Bıýro otyrysynda depýtattar qaraýyna Kaspıı teńiziniń teńiz ortasyn qorǵaý jónindegi negizdemelik konventsııaǵa qorshaǵan ortaǵa transshekaralyq turǵydan jasalatyn áserdi baǵalaý jónindegi hattamany ratıfıkatsııalaý týraly zań jobasy usynyldy.
Kún tártibiniń jobasynda qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha zań jobasyn jumysqa alý qarastyrylǵan. Sonymen qatar, Palatanyń beıindi komıtetteri birqatar jańa ratıfıkatsııalanatyn zań jobalaryn jumysqa almaq. Atap aıtqanda, Múgedekterdiń quqyqtary týraly konventsııaǵa Fakýltatıvtik hattamany jáne Qazaqstan men Reseı Úkimetteri arasyndaǵy «Baıqońyr» ǵarysh aılaǵynda «Báıterek» ǵarysh zymyran keshenin qurý týraly kelisimge ózgerister men tolyqtyrýlar engizý týraly hattamany ratıfıkatsııalaý týraly zań jobalary bar.
