Nurlan Nyǵmatýlın birqatar elderdiń spıkerlerimen kezdesti
ASTANA. QazAqparat - Májilis Tóraǵasy Nurlan Nyǵmatýlın Eýrazııa elderi parlamentteri spıkerleriniń Úshinshi jınalysy aıasynda Vetnam, Iordanııa, Iran, Qytaı, Koreıa, Qyrǵyzstan, Ózbekstan Parlamenti Spıkerlerimen kezdesti. Bul týraly QazAqprat Májilistiń baspasóz qyzmetine silteme jasap habarlaıdy.
Koreıa Respýblıkasynyń Ulttyq Assambleıasynyń tóraǵasy Mýn Hı Senmen áńgimelesý barysynda Qazaqstan - Ońtústik Koreıa yntymaqtastyǵynyń keshendi jáne parlamentaralyq baılanystardy damytýdyń mańyzy týraly aıtyldy.
Nurlan Nyǵmatýlın Ońtústik Koreıa bizdiń elimizdiń Shyǵys Azııadaǵy strategııalyq áriptesteriniń biri bolyp tabylatynyn jáne 2016 jyly Qazaqstan Prezıdenti Nursultan Nazarbaevtyń Seýlge jasaǵan sapary eki jaqty seriktestikti damytý úshin jańa múmkindikter ashqanyna toqtaldy.
Óz kezeginde Mýn Hı San jyl artqan saıyn jaqyn Ońtústik Koreıa men Qazaqstan arasyndaǵy baılanystyń nyǵaıa túskenin aıtty. Sondaı-aq, Ulttyq Assambleıa tóraǵasy Qazaqstan Prezıdentine Koreı túbegindegi dıalogty damytýǵa qoldaý kórsetkeni úshin alǵysyn bildirdi.
Mýn Hı San Qazaqstannyń kelesi jyly Eýrazııa elderi parlamentteri spıkerleriniń Tórtinshi kezdesýin ótkizý týraly bastamasyn qoldap, sharanyń joǵary deńgeıde uıymdastyrylýyna tilektestik bildirdi.
Nurlan Nyǵmatýlınniń Qyrǵyzstan Joǵary Keńesiniń spıkeri Dastanbek Jumabekov jáne Ózbekstan Parlamentiniń spıkeri Nurdınjon Ismoılovpen kezdesýi barysynda parlamentaralyq yntymaqtastyqty odan ári arttyrý týraly kelisimder jasaldy.
Kezdesý barysynda Qazaqstan Respýblıkasynyń Prezıdenti Nursultan Nazarbaevtyń dostyq qatynastardy damytý jáne kórshi memlekettermen tıimdi yntymaqtastyqty tereńdetý týraly saıasatyna nazar aýdarǵan Májilis Tóraǵasy memleket basshylary qol jetkizgen ýaǵdalastyqtar elder arasyndaǵy qarym-qatynastardy jańa deńgeıge kóterýge múmkindik beretinin aıtty.
Májilis Tóraǵasy Nurlan Nyǵmatýlın Búkilqytaılyq Halyq Ókilderi Jınalysy Tóraǵasynyń orynbasary Baıma Chılınmen, Vetnam Ulttyq Assambleıasynyń tóraǵasy Ngýen Tı Kım Ngan, Iordanııa Senatynyń Tóraǵasy Faızal Akıf Al-Faızmen, sondaı-aq Iran Islamdyq Konsýltatıvtik keńesiniń tóraǵasy Álı Ál-Larımen kezdesip, parlamentaralyq dıalogty damytý máselelerin talqylady.
