Nurlan Nyǵmatýlın: Bankter úshin 15 AEK somasyndaǵy aıyppul eshteńe emes
NUR-SULTAN. QazAqparat - Parlament Májilisiniń jalpy otyrysynda depýtattar bankterdiń valıýtalyq zańnama talaptaryn qaıtalap buzǵany úshin belgilengen aıyppuldy qomaqty somaǵa kóterý kerektigin usyndy, dep habarlaıdy QazAqparat tilshisi.
Aıta keteıik, palata depýtattary «Qazaqstan Respýblıkasynyń keıbir zańnamalyq aktilerine qarjy naryǵyn retteý men damytý jáne mıkroqarjylyq qyzmet máseleleri boıynsha ózgerister men tolyqtyrýlar engizý týraly» zań jobasy birinshi oqylymda talqylady.
Depýtat Amanjan Jamalovtyń sózine qaraǵanda, zań jobasyna sáıkes valıýtalyq zańnama aıasyndaǵy buzýshylyqtardy joıý týraly QR Ulttyq bankiniń talaptaryn oryndamaǵany úshin bankterge ákimshilik jaza qarastyrylǵan. Osy oraıda jyl ishinde bul áreket ekinshi deńgeıli bankter tarapynan qaıtalansa, 15 AEK (37 875 teńge) somasynda aıyppul salynady.
«Bankter úshin aıyppuldyń bul kólemi qandaı esepteýlermen aıqyndaldy? Sebebi valıýtalyq zańnamanyń oryndalýy banktik zańnama talaptaryn atqarýdyń bir bóligi bolyp sanalady», - dedi A. Jamalov.
Óz kezeginde Ulttyq bank tóraǵasy Erbolat Dosaev valıýtalyq zańnama talaptaryn oryndamaǵany úshin aıyppul qoldanystaǵy zańnamada qarastyrylǵanyn atap ótti.
«Qazaqstan qarjygerleri qaýymdastyǵymen konsýltatsııa jasalǵannan keıin, 15 AEK kólemindegi ákimshilik aıyppul kelisýge turarlyq dep sanaımyn», - dedi UB basshysy.
Alaıda bul ýájben Májilis tóraǵasy Nurlan Nyǵmatýlın kelispeıtinin baıqatty.
«Bankter úshin 15 AEK degen kóp pe? 38 myń teńge bank úshin aýyrtpalyq pa? 50 AEK somasyndaǵy aıyppul da aıtarlyqtaı joǵary emes. Bul turǵyda banktiń zańnamany qaıtalap buzý áreketi aıtylyp otyr. Sondyqtan Erbolat Asqarbekuly, ekinshi oqylymǵa deıin bankterdiń deńgeıine saı aıyppuldy engizińizder. Óıtkeni bul jerde zańnamany qaıtalap buzý máselesi talqylanyp otyr», - dedi N. Nyǵmatýlın.
Ulttyq bank tóraǵasy Erbolat Dosaev búgingi talqylanǵan zań jobasyn ekinshi oqylymǵa deıin talqylaý barysynda atalǵan másele pysyqtalatynyna ýáde etti.
