Nurlan Nyǵmatýlın Ázerbaıjan Mıllı Májilisiniń spıkerimen kezdesti

NUR-SULTAN. QazAqparat - Búgin Májilis tóraǵasy Nurlan Nyǵmatýlın Qazaqstanǵa alǵash ret resmı saparmen kelgen Ázerbaıjan Mıllı Májilisiniń Spıkeri Sagıba Gafarovamen kezdesti, dep habarlaıdy QazAqarat QR Parlamenti Májilisiniń baspasóz qyzmetine silteme jasap.

Taraptar Qazaqstan men Ázerbaıjan basshylarynyń ýaǵdalastyqtaryn zań jaǵynan qoldaý, sondaı-aq eki eldiń jan-jaqty ózara is-qımylyn damytýǵa arnalǵan múmkindikterin atap ótti.

Nurlan Nyǵmatýlın men Sagıba Ǵafarova yntymaqtastyq jónindegi toptardyń, tıisti komıtetterdiń birlesken jumysyn jandandyrýdy, zańnamalyq tájirıbe almasýdy qoldap, pikir almasty.

Kezdesýde Májilis tóraǵasy Qazaqstannyń Tuńǵysh Prezıdenti-Elbasy Nursultan Nazarbaevtyń Ázerbaıjanmen qarym-qatynasty strategııalyq seriktestik pen baýyrlas halyqtar arasyndaǵy dostyq rýhynda nyǵaıtý úshin berik irgetas qalaýǵa qosqan erekshe úlesin atap ótti.

Nurlan Nyǵmatýlınniń aıtýynsha, búgin Memleket Basshysy Qasym-Jomart Toqaev Bakýmen yntymaqtastyqty tereńdetýge mán beredi.

Óz kezeginde, Ázerbaıjan Mıllı Májilisiniń Spıkeri Sagıba Gafarova baýyrlas elderimizdi túrki dúnıesine ortaq mádenıet, ortaq dástúrler, ortaq tarıh baılanystyratynyn atap ótti.

Sonymen qatar, Túrkistanda ótken Túrkitildes elder Parlamenttik Assambleıasynyń H plenarlyq otyrysynyń qorytyndylary týraly aıtqan Nurlan Nyǵmatýlın men Sagıba Ǵafarova otyrysta qabyldanǵan sheshimder parlamentaralyq dıalogty nyǵaıtýǵa, sondaı-aq túrki elderi arasyndaǵy jan-jaqty yqpaldastyqty damytatynyna senim bildirdi.