Nurlan Nyǵmatýlın Aýstrııadan kelgen táýelsiz baqylaýshylarmen kezdesti

NUR-SULTAN. QazAqparat - Májilis Tóraǵasy Nurlan Nyǵmatýlın Qazaqstan Respýblıkasy Prezıdentiniń kezekten tys saılaýyna táýelsiz baqylaýshy retinde Aýstrııadan kelgen Krıstın Mýttonen jáne Vofgang Grossrýkpen kezdesti. Bul jóninde Májilistiń baspasóz qyzmetine silteme jasap QazAqparat habarlaıdy.

N. Nyǵmatýlın mártebeli meımandarǵa osy jyldyń basynda Qazaqstanda bolǵan aıtýly saıası ózgeris jaıynda habardar ete kelip, Qazaqstannyń Tuńǵysh Prezıdenti-Elbasy Nursultan Nazarbaevtyń bul sheshimi - bıliktiń joǵary tarmaǵyndaǵy sabaqtastyqty qamtamasyz etýdiń aıqyn dáleli ekenin aıtty.

Osy oraıda, maýsym aıynyń 9-yna belgilengen kezekten tys prezıdent saılaýy eldegi qoǵamdyq-saıası kelisimdi saqtaýǵa, úzdiksiz alǵa jyljı otyryp, áleýmettik-ekonomıkalyq mańyzdy máselelerdi sheshýge baǵyttalǵan.

N. Nyǵmatýlın atap ótkendeı, halyqaralyq standarttarǵa sáıkes, taza, ashyq jáne ádil, demokratııalyq saılaý ótkizý úshin barlyq jaǵdaı jasaldy.

Óz kezeginde Aýstrııa Parlamenti Ulttyq Keńesiniń burynǵy depýtaty Krıstın Mýttonen Qazaqstandaǵy saılaýǵa daıyndyq tańqalarlyq joǵary deńgeıde ekenin jáne saılaýshylardyń kóptep qatysýyn qamtýǵa arnalǵan sharalardyń da qýantarlyq ekenin alǵa tarta kelip, osyndaı dárejede uıymdastyrylǵan saılaýǵa baıqaýshy retinde qatysýǵa aıryqsha yntaly ekenin jetkizdi. Sondaı-aq, eldiń bolashaǵy úshin mańyzdy sanalatyn erteńgi saıası naýqanǵa zor tabys tiledi.

Taraptar odan ári eki el arasyndaǵy, sonyń ishinde, parlamentaralyq yntymaqtastyqty nyǵaıtýdyń ózekti máselelerin talqylady.

Májilis Tóraǵasynyń pikirinshe, Aýstrııa - Qazaqstannnyń Eýropadaǵy mańyzdy strategııalyq áriptesi. Al, Vena - elimizdiń aldyńǵy qatarly saýda seriktesteriniń biri.

Taraptar atap ótkendeı, aldaǵy ýaqytta da ózara yntymaqtastyqty odan ári tereńdetýdiń jáne keńeıtýdiń mańyzy zor.