Nurlan Nyǵmatýlın Atambaevtyń aıtqandaryn jaýapsyz jáne popýlıstik dep atady
ASTANA. QazAqparat - Májilis Tóraǵasy Nurlan Nyǵmatýlın Almazbek Atambaevtyń aıtqan sózderine pikir bildirdi, dep habarlaıdy QR Parlamenti palatasynyń baspasóz qyzmeti.
Onyń aıtýynsha, Qazaqstan Prezıdenti Nursultan Nazarbaev Qyrǵyzstan halqyn ózgelerdiń bárinen artyq qoldap, kómektesip jatyr.
«Qyrǵyzstan halqynyń da Qazaqstan kóshbasshysyna jyly lebizben jáne rızashylyqpen qaraıtynyn bilemin. Sondyqtan, Atambaevtyń osyndaı «bos», popýlıstik jáne jaýapsyz sózderi bizdiń halyqtardyń baýyrlastyq qatynasyna syzat túsirmeýi kerek», - dep málimdedi N.Nyǵmatýlın.
Spıker sondaı-aq Atambaevtyń basshylyq etken jyldarynda eshqandaı nátıjege qol jetkizbegenin atap ótti.
«Atambaevtyń ózine toqtalar bolsaq, óziniń prezıdenttik etken jyldary ekonomıkada da, saıasatta da eshqandaı nátıje kórsete almaǵany barshaǵa aıan. Endi, ketip bara jatyp óziniń saıası, sondaı-aq ishki mádenıetiniń múldem joq ekenin dáleldedi», - dedi Májilis Tóraǵasy.
