Nurlan Nyǵmatýlın Anatolıı Karpovpen kezdesý ótkizdi
NUR-SULTAN. QazAqparat - Búgin Májiliste Palata Tóraǵasy Nurlan Nyǵmatýlın Reseı Memlekettik Dýmasy Halyqaralyq ister komıteti tóraǵasynyń orynbasary Anatolıı Karpovpen kezdesti, dep habarlaıdy QazAqparat Májilistiń baspasóz qyzmetine silteme jasap.
Kezdesý barysynda taraptar Qazaqstan men Reseı arasyndaǵy túrli saladaǵy ózekti máselelerdi talqylady.
Májilis Tóraǵasynyń pikirinshe, Reseı - bizdiń elimizdiń mańyzdy strategııalyq áriptesi jáne basty odaqtasy. Nurlan Nyǵmatýlınniń aıtýynsha, Qazaqstannyń Tuńǵysh Prezıdenti, Elbasy Nursultan Nazarbaev pen Reseı Federatsııasynyń Prezıdenti Vladımır Pýtınniń ózara túsinistik pen dostyqqa negizdelgen birlesken jumysynyń arqasynda kópqyrly yntymaqtastyqtyń joǵary nátıjelerine qol jetkizildi. Sonymen qatar, Májilis Tóraǵasy Qazaqstan-Reseı qarym-qatynastaryn nyǵaıtýǵa baǵyttalǵan Elbasy kýrsynyń úzdiksizdigi qamtamasyz etiletinin atap ótti.
Nurlan Nyǵmatýlın men Anatolıı Karpov ekijaqty yntymaqtastyqtyń mańyzdy quramdas bóligi retinde parlamentaralyq baılanystardy odan ári tereńdetýge senim bildirdi.
Óz kezeginde Anatolıı Karpov Qazaqstanmen ony parlamenttik salamen qosa qoǵamdyq qyzmet te baılanystyratynyna toqtaldy. Atap aıtqanda, shahmat salasynda. A.Karpov jetekshilik etetin Halyqaralyq beıbitshilik pen kelisim qorlar qaýymdastyǵy bitimgershilik jobalaryna belsendi qatysady. Bul turǵyda Qazaqstannyń tájirıbesi de zor qyzyǵýshylyq týdyryp otyr.
