Nurlan Nyǵmatýlın aldaǵy besinshi sessııada depýtattardyń atqaratyn jumysyn aıtty
NUR-SULTAN. QazAqparat - Búgin Parlament palatalarynyń birlesken otyrysynda Májilis tóraǵasy Nurlan Nyǵmatýlın depýtattardyń aldaǵy sessııada atqaratyn jumystary týraly aıtty, dep habarlaıdy QazAqparat tilshisi.
«Aldaǵy besinshi sessııa jumysyn aıta ketsek, Parlament Elbasy Nursultan Nazarbaevtyń Joldaýy men áleýmettik qamqorlyq bastamalaryn iske asyrýǵa arnalǵan jumystardy odan ári jalǵastyratyn bolady. Sonymen birge, depýtattar óz jumystarynda Memleket basshysy Qasym-Jomart Toqaev usynǵan 10 negizgi baǵytty basshylyqqa alynady», - dedi N. Nyǵmatýlın.
Onyń sózine qaraǵanda, qazirgi ýaqytta Parlament qorjynynda 34 zań jobasy bar.
«Bizdiń aldymyzda 2020-2022 jyldarǵa arnalǵan respýblıkalyq bıýdjet týraly zańdy qabyldaý mindeti tur. Bul qujattyń negizgi maqsaty - halyqtyń ómir sapasyn jaqsartýǵa arnalǵan memlekettik baǵdarlamalarǵa tıisti qarajat bólýdi qamtamasyz etý. Sonymen birge, «Halyq densaýlyǵy jáne densaýlyq saqtaý júıesi týraly» Kodeks, sondaı-aq jańa Ekologııalyq kodeksti qabyldaý birinshi kezektegi mańyzdy jumystardyń biri. Buǵan qosa, bolashaq urpaqty tárbıeleıtin, úlken jaýapkershilikti qajet etetin pedagog mártebesi týraly jáne mádenıet máselelerine arnalǵan zańdarymyz bar», - dedi N. Nyǵmatýlın.
Onyń atap ótýinshe, aldaǵy sessııada Parlamentte tarıhı mańyzy zor iri halyqaralyq shara ótetin bolady. Bıylǵy qyrkúıekte elordada Eýrazııa elderi parlamentteri spıkerleriniń tórtinshi forýmy bolady. «Úlken Eýrazııa: Dıalog. Senim. Seriktestik» dep atalatyn mańyzdy jıynǵa 60-tan astam eldiń parlament basshylary qatysady, sonymen birge, 16 halyqaralyq jáne parlamenttik uıym basshylary keledi dep kútilýde.
Budan buryn habarlanǵandaı, Qazaqstan Parlamenti depýtattary kanıkýlǵa ketti.
