Nurlan Nyǵmatýlın AQSh kongressmenderimen kezdesti

NUR-SULTAN. QazAqparat - Májilis Tóraǵasy Nurlan Nyǵmatýlın AQSh Kongresi Ókilder Palatasy músheleri Devın Nýnes jáne Rık Kroýfordpen kezdesti, dep habarlaıdy QazAqparat tómengi palatanyń baspasóz qyzmetine silteme jasap.

Palata spıkeri atap ótkendeı, AQSh-pen ózara tıimdi jan-jaqty baılanysty damytý bizdiń elimizdiń syrtqy saıasatynyń basym baǵyttarynyń biri. Nurlan Nyǵmatýlın Qazaqstannyń Tuńǵysh Prezıdenti – Elbasy Nursultan Nazarbaevtyń 2018 jyly qańtarda Amerıka Qurama Shtatyna jasaǵan resmı sapary eki el arasyndaǵy keńeıtilgen strategııalyq áriptesikke serpin bergenin atap ótti. Osy rette Májilis Tóraǵasy Qazaqstan Prezıdenti Qasym-Jomart Toqaevtyń qalyptasqan syrtqy saıası ustanymdy saqtaı otyryp, áleýmettik-ekonomıkalyq damýǵa arnalǵan strategııalyq baǵytty jalǵastyryp kele jatqanyna nazar aýdardy.

Taraptar ekijaqty qarym-qatynasty damytýdyń, sonyń ishinde halyqaralyq qaýipsizdik, energetıka, aýyl sharýashylyǵy basqa da salalar boıynsha yqpaldastyqty nyǵaıtý máselelerin talqylady.

Óz kezeginde Devın Nýnes bizdiń elimizdiń kóptegen baǵyttar boıynsha jetistikterine joǵary baǵa berdi. Sondaı-aq, elderimiz arasyndaǵy lańkestikpen kúres boıynsha syndarly baılanysqa kóńil bóldi.

Kezdesý barysynda N. Nyǵmatýlın parlamentaralyq yntymaqtastyq týraly da sóz qozǵap, Májilis depýtattarynyń AQSh-taǵy áriptesterimen zań shyǵarý jumysynda tájirıbe almasýǵa yntaly ekenin jetkizdi.