Nurlan Noǵaev: Jas urpaq óz ulttyq oıyndaryn bilýi qajet
Budan buryn habarlanǵandaı, Astanada Atyraý oblysynyń kúnderi aıasynda at jarysy ótken. Oblys ákimi Nurlan Noǵaevtyń aıtýynsha, 16-20 shilde aralyǵynda mádenıet kúnderi baǵdarlamasyn ótkizý ýaqytynda Atyraý óńirinen kelgen uıymdastyrýshylar ólkeniń jetistigi, onyń ótkeni men turǵyndary maqtan tutatyn qazirgi erekshelikterin kórsete aldy.
- Qazaqstan astanasynda EKSPO halyqaralyq kórmesin ótkizý - eldiń eń aýqymdy jetistikteriniń biri, bul Memleket basshysynyń orasan eńbegi. Óskeleń urpaq óz ulttyq oıyndaryn bilýi mańyzdy. Sondyqtan da mádenıet kúnderin báıge jarysymen aıaqtaýdy jón sanadyq», - dedi ákim Nurlan Noǵaev
Eske salsaq, qatysýshylar úsh tártipte jarysqa tústi. 5 shaqyrym - jorǵa jarys, 7 shaqyrym - qunan báıge, 21 shaqyrym - alaman báıge. Qazaqstannyń ár oblysynan, Astana men Almaty qalalarynan 3 tulpardan qatysty. Atyraý oblysy jarys ıesi retinde 9 júırigin qosa aldy. Mádenıet jáne sport mınıstri Arystanbek Muhamedıuly, Aqparat jáne kommýnıkatsııalar mınıstri Dáýren Abaev, Astana ákimi Áset Isekeshov, Atyraý oblysynyń ákimi Nurlan Noǵaev jeńimpazdarǵa medal, dıplom, aqshalaı júldeler tabystady.
Alaman báıgege 62 tulpar qatysty. Márege almatylyq Dııas Jumash birinshi bolyp jetti. Onyń «Tosqyn» atty sáıgúligi 2014 jyldan beri jarysqa qatysyp keledi. Bıyl 6 júldeli oryn ıelengen. Balanyń ákesiniń aıtýynsha, uly ár kez birinshi bolyp keledi. N. Noǵaev jeńimpazǵa 13 mln teńgeniń sertıfıkatyn tapsyrdy. Ekinshi oryn astanalyq Erbol Zamýdınge buıyrdy - 7 mln teńge. Úshinshi oryndy pavlodardyq Ibragım Bóbekbaı aldy (5 mln teńge).
4-shi jáne 5-shi kelgenderge 2 mln teńgeden berildi. Júlde qory demeýshiler qarajatynan jınalǵanyn atap ótken jón. 5 shaqyrymǵa deıin qashyqtyqta Aıhan Tólegenov jeńiske jetse, qunan báıgede Jolaýshy Dilmuhamet birinshi keldi.
«Nomad» tobynyń teatrlandyrylǵan kórinisi keshtiń kórkin kirgizdi, onda kaskaderlar óner kósretti. Ulttyq báıge jarysy, qyz qýý, sadaq atý, t.b. kórsetilimder qoıyldy.
