Nurlan Noǵaev jańa aýdandarda mektep pen balabaqshanyń joqtyǵyn synǵa aldy
Kezdesýge oblystaǵy qurylys kompanııalarynyń basshylary men memlekettik organ ókilderi qatysty.
Jıyn barysynda Nurlan Noǵaev qala salýda qarapaıym talaptardyń saqtalmaı otyrǵanyn synǵa alyp, Aqtaý qalasynyń ákimine, oblystyq qurylys basqarmasy men qala qurylysy jáne jerdi baqylaý basqarmasynyń basshylaryna tekserý júrgizip, qurylystardyń bas josparǵa saı oryndalýyn qamtamasyz etýdi tapsyrdy.
«Halyq jekelegen shaǵynaýdandarda qurylystyń óte tyǵyz salynyp jatqanyn aıtýda. Turǵyndardan jańa shaǵynaýdandarda mektep pen balabaqshalardyń joqtyǵyna qatysty shaǵym da kóptep túsýde. Olar balalaryn qaıda aparady? Túsinemin, sizder paıda tapqylaryńyz keledi, biraq olaı bolmaıdy ǵoı. Bul úılerdi turǵyzǵanda ne oıladyńyzdar? Qala qurylysynyń retsiz salynýy – bul birinshi kezekte halyqty qurmettemeý», - dedi N. Noǵaev.
Sonymen qatar aımaq basshysy óńirde keıbir nysandardyń jobalaý-smetalyq qujatynsyz salynyp jatqany týraly aqparat baryn aıtty.
«Qalaǵan jerge záýlim saraı kótere bersek, bas jospardyń qajeti ne? Barlyq qurylys zań aıasynda júrgizilýi tıis. Bul jaýapty organdardyń ózara zańsyz kelisiminiń saldary. Máseleni anyqtap, tıisti shara qabyldaýdy tapsyramyn», - dedi aımaq basshysy.
Jıynda úleskerler máselesi de kóterildi.
«Keıbir qurylys kompanııalarynyń jaýapsyzdyǵynan turǵyndar zardap shegýde. Alaıaq kompanııalardyń arbaýyna túsken júzdegen adam baspanasyz qalamyz ba dep qaýiptenedi. Maǵan, meniń áriptesterime qurylysshylarǵa úılerdi aıaqtaýdy mindetteýdi surap, kúnine birneshe adam habarlasady. Qolmen jasaǵandy moıyndaryńyzben kóterińizder. Shamalaryńyz kelmese mindetteme almańyzdar. Osyndaı máseleniń aldyn alý úshin jergilikti atqarýshy organdar men quqyq qorǵaý organdarynyń basshylarynda barlyq múmkindik bar, jumystanyńyzdar», - dedi Nurlan Noǵaev.
Oblys ákimi sondaı-aq, Prezıdent tapsyrmasyna saı ıgerilmeı jatqan jerlerdi memleketke qaıtarý qajettigin aıtty. Osy oraıda orynbasary Ǵalymjan Nııazovqa oblys kólemindegi bos jerlerge monıtorıng júrgizip, keri qaıtarýdy tapsyrdy. Zań aıasynda áreket etip, bul máselede bosańsýǵa bolmaıtynyn málimdedi.
«Turǵyndar tarapynan Shetpe mańyndaǵy karerge qatysty da shaǵym tústi. Qıyrshyq tas óndiretin karerlerden shań kóterilip, adam densaýlyǵyna zııan keltirip jatqanyn aıtýda. Tekserý júrgizińizder. Munda prokýratýra ókilderi otyr, solarmen birlesip, zań aıasynda tıisti shara qoldanyńyzdar», - dep qorytyndylady Nurlan Noǵaev.