Nurlan Noǵaev úsh gaz jobasyn júzege asyrý jospary týraly aıtty

NUR-SULTAN. QazAqparat – Memleket basshysynyń Joldaýyndaǵy tapsyrmalardy oryndaýǵa arnalǵan Úkimet otyrysynda Energetıka mınıstri Nurlan Noǵaev 3 gaz jobasyn júzege asyrý jospary týraly aıtty, dep habarlaıdy QazAqparat tilshisi.

Onyń atýynsha, Memleket basshysynyń tapsyrmasyn oryndaý maqsatynda 3 gaz jobasyn júzege asyrýdy josparlanǵan. Birinshi joba – Qashaǵan ken ornynda jylyna 1 mlrd tekshe metr shıki gazdy qaıta óńdeý qýaty bar gaz óńdeý zaýytyn salý.

Qazirgi ýaqytta alańda qurylys-montajdaý jumystary júrgizilip jatyr. Jobany iske asyrý 2041 jylǵa deıingi kezeńde qosymsha 10 mln tonna munaı óndirýge, sondaı-aq jylyna 800 mln tekshe metrge deıin taýarlyq gaz óndirýge múmkindik beretinin atap ótken jón.

Tutastaı alǵanda, esepteýler elimiz úshin de, Qashaǵan ken ornynyń merdiger kompanııalary úshin de gaz óńdeý zaýytyn salýdyń joǵary ekonomıkalyq tıimdiligin kórsetip otyr.

«Sonymen qatar, búgingi tańda «Maqat – Soltústik Kavkaz» jáne «Okarem-Beıneý» magıstraldyq gaz qubyrlary Qazaqstannyń batys óńirlerindegi tutynýshylardy gazben jabdyqtaýdy qamtamasyz etýde. Bul gaz qubyrlary keńes zamanynda bir jelilik baǵytta salynǵan, óziniń paıdalaný resýrsyn ótep boldy jáne dıagnostıkalyq zertteý nátıjeleri boıynsha olardyń kóptegen aqaýlary bar. Osyǵan baılanysty energetıkalyq qaýipsizdikti qamtamasyz etý jáne óńirlerdiń gazǵa degen ósip kele jatqan qajettiligi úshin gazdyń qosymsha kólemin tasymaldaý maqsatynda «Maqat – Soltústik Kavkaz» magıstraldyq gaz qubyrynyń lýpıngin jáne «Beıneý-Jańaózen» magıstraldyq gaz qubyrynyń 2-shi jelisin salý josparlanýda. Jalpy, qazirgi ýaqytta barlyq 3 gaz jobasy boıynsha jobalaý-smetalyq qujattama ázirlendi jáne iske asyrýdyń praktıkalyq bóligi, onyń ishinde joǵaryda kórsetilgen jobalardy qarjylandyrýǵa baılanysty jumystar júrgizilip jatyr», - dedi mınıstr.