Nurlan Noǵaev: Teńizdegi qazirgi jumys jaǵdaıy jumysshylardyń kóńilinen shyqpaıdy
ATYRAÝ. QazAqparat - Atyraý oblysynyń ákimi Nurlan Noǵaev iri munaı kompanııalary men olardyń merdigerlerimen jınalys ótkizdi, dep habarlaıdy QazAqparat tilshisi Atyraý oblysy ákiminiń baspasóz qyzmetine silteme jasap.
Atyraý oblysynyń ákimi Teńiz vahta qalashyǵyndaǵy oqıǵa eńbek jaǵdaıynyń barlyǵyna birdeı bolmaýy saldarynan týyndaǵanyn, sondyqtan TShO men merdiger mekemeler jaǵdaıdy túbegeıli ózgertýge kúsh salýy kerektigin atap ótti.
«Eńbekaqy aıyrmashylyǵy týraly shaǵym kóp. Jalaqy, jumysshylardy ústeme jumystarǵa tartqany úshin tólenetin aqylardyń ýaqyty keshiktiriledi. Mereke, demalys kúnderi istegen jumystar úshin paıdalanylmaǵan kúnderge ótemaqy tóleý ýaqyty buzylady. Jumys kúni kestesin ózderi belgileıtin derekter bar. Teńiz jobasynda merdiger mekemelerdiń biriniń basshysy kún saıynǵy jumys kúnin óz betinshe 4 saǵatqa kóbeıtken. Ujymnyń narazylyǵy men eńbek ınspektsııasyna shaǵymdanýdan keıin jaǵdaı qalypqa keldi. Kópshiligi jumys berýshiniń zańsyz áreketin, Eńbek kodeksiniń talabyna sáıkessizdikti ashyp aıtýǵa qorqady. Jumys berýshi qandaı da bir sebep taýyp, jumystan shyǵaryp jiberetinin aıtyp qorqytady. Mundaı derekter bar. Kúzet fırmasynyń ókilderi nysandarda qaýipsizdik pen tártipti saqtaý boıynsha tikeleı qyzmettik mindettemelerin oryndaýdyń ornyna jumysshylardy qorqytýmen aınalysqany jóninde derekter bar. Shaǵym aıtqan jumysshydan qutylýdyń túrli quıtyrqy áreketterin jasaǵan faktiler de kezdesedi. Bul, árıne, adamdy ashyndyratyn, tipti daý-janjalǵa ákeletin jaǵdaı. Sizderdiń mindet - osyndaı jaǵdaılardyń aldyn alý»,-dedi Nurlan Noǵaev.
Oblys ákimi qazirgi eńbek jaǵdaıy merdiger mekemesindegi jumysshylardyń kópshiligin qanaǵattandyrmaıtynyn atap ótti.
«Shaǵym óte kóp, qurmetti jumys berýshiler! Buryn bul jaǵdaı qalypty sanalsa, endi sony ózgertetin ýaqyt jetti. Memleket basshysynyń birdeı jumys isteıtin mamandardyń azamattyǵyna qaramaı, birdeı laıyqty eńbekaqy tóleý jóninde tapsyrmasy bar. Iá, belgili bir qyzmettik ıerarhııaǵa kelisemin, barlyǵyn teńestirýge bolmaıdy, biraq ádildik bolýy tıis. Bir ujymda birdeı jumys istegen eki adamnyń biri 300 dollar, ekinshisi 3000 dollar almaýy kerek, halyq kórip otyr. Kópshiligi muny istegen jumysy men kórsetken qyzmetine adal aqy almaýymen baılanystyrady. Tapsyrys berýshiler, TShO, NSOS nemese basqa iri kompanııalar bolsyn, óz tarapynan eńbekaqyny ádil tólep otyrǵanyn aıtady, biraq sońynda báribir belgili bolyp qalady. Jumysshynyń qolyna eń sońynda shamaly tıyn-teben túsedi. Sosyn ol ózimen birdeı jumys istegen shetel azamatynyń eńbekaqysyn kórip, ózine «men nege zardap shegýim kerek?» degen saýal qoıady»,-dedi ákim.
Nurlan Noǵaev jergilikti atqarýshy organdar barlyq eńbekaqyny kóterýge mindettemeıtinin, kompanııalardyń óndiristik mindettemelerin sheshpeıtinin atap ótti.
«Men sizderdiń aldaryńyzǵa Eńbek kodeksiniń, elimizdegi barlyq zańdardyń, sonyń ishinde kóshi-qon zańnamasynyń buzylýyna jol bermeýmindetin qoıamyn. Barlyq jumysshyǵa teń, qolaıly jaǵdaı jasalýy kerek. Biz óz tarapymyzdan sizderdiń bastamalaryńyzdy kútip otyrmaımyz, jumys isteımiz. Eger jaǵdaıdy óz erikterińizben ózgertkilerińiz kelmese, zańǵa sáıkes áreket etýge kúshimiz jetedi. Oblys ákiminiń birinshi orynbasary jetekshilik etetin vedomstvoaralyq komıssııa barlyq máselelerdi qarap, olardyń sheshilýin baqylaýda ustaıdy»,-dedi jınalǵandarǵa aımaq basshysy.
