Nurlan Noǵaev Teńiz ken ornynyń bolashaǵy týraly aıtty
«Qazirgi tańda Teńiz ken ornyn ıgerýdegi bolashaq keńeıtý jobasy iske asyp jatyr. Barshamyzdyń nazarynda júrgen másele - osy jobaǵa jumsalatyn qarajattyń, joba qunynyń naqtylanýy. Jaqynda Teńizshevroıl kompanııasy seriktester keńesiniń otyrysynda jobaǵa jumsalatyn qarajatty 36,8 mlrd teńgeden 45,2 mlrd teńgege deıin arttyrý jóninde sheshim qabyldandy. Qazirgi tańda aktsıonerlerdiń osy sheshimdi bekitýin kútip otyrmyz. Bolashaq keńeıtý jobasynyń keıbir jumystary 75 paıyzǵa deıin, qural-jabdyqtar ákelý 50 paıyzdan joǵary oryndaldy. Búginde osy jobaǵa 43 myńnan astam adam jumyldyrylǵan», - dedi mınıstr.
Onyń atap ótýinshe, 2016 jyly Qashaǵan ken ornyn iske qosqannan keıin elimizde munaı óndirý dınamıkasy oń baǵytta jyljydy. Qazirgi tańda Teńiz, Qashaǵan, Qarashyǵanaq ken oryndaryn, QazMunaıGaz syndy ózge de kompanııalar ıgerip otyrǵan ken oryndaryn tıimdi paıdalanýdy qamtamasyz etý mańyzdy másele bolyp otyr.
«Teńiz ken orny iske qosylǵan 1993 jyldan bastan búginge deıin 451 mln tonna munaı, 240 mlrd tekshe metr gaz óndirildi. 56 mlrd dollar kúrdeli salymdar jáne mindetti tólemder júzege asyryldy. Respýblıkaǵa 98 mlrd teńge tústi. 2019 jyly bul kórsetkishter 29,8 mln tonna munaıdy, 16,3 mlrd tekshe metr gazdy jáne 5,7 mlrd dollardy mindetti tólemderdi qurady», - dedi Nurlan Noǵaev.
