Nurlan Noǵaev sheshim qabyldaýdan qorqatyn basshylardy aıyptady (FOTO)
ATYRAÝ. QazAqparat - Búgin, 10 tamyz kúni Atyraý oblysynyń ákimi Nurlan Noǵaev aýdandarǵa jasaǵan saparynyń qorytyndy jınalysyn ótkizdi. Otyrysqa aýdan ákimderi, basqarma basshylary men BAQ ókilderi qatysty.
Oblys ákiminiń baspasóz qyzmetiniń habarlaýynsha, sapar qorytyndysy boıynsha oblys ákimi aýdandardy damytý jumys josparyn jasaqtap, onyń aıasynda 223 is sharany bekitip berdi. Atalǵan sharalar josparyn oryndaý men olardyń oryndalysyn baqylaý aýdan ákimderi men oblys ákimniń orynbasarlaryna tapsyryldy.
Nurlan Noǵaevtyń aıtýynsha, aýdandardaǵy ınfraqurylym, áleýmettik máselelerdi sheshý jumystary durys jolǵa qoıylǵan. Ásirese, aýylsharýashylyq salasynyń damýy qarqynmen júrip jatyr. Oblystyń burynǵy basshylyǵy óńirde sıyr sútin, eshki sútin óndirý zaýyttary, kóptegen egis alqaptaryn qolǵa alǵan. Aımaq basshysy osy jumystardy ári qaraı ár aýdannyń ereksheligin eskere otyryp jalǵastyratynyn aıtty.
Nurlan Noǵaev erekshe toqtalǵan jaǵdaı aýyz sý máselesi boldy. Naqty aıtqanda, Qurmanǵazy aýdanyndaǵy Azǵyr eldi mekeniniń jaǵdaıy sóz etildi. Onyń aıtýynsha, aýyl halqy áli kúnge deıin sýdy kólikpen tasyp iship otyr. Ol azdaı jańadan salynǵanyna qaramastan sý saqtaıtyn eki rezervýardyń bireýi tesilip tur. Aımaq basshysy buǵan jaýapty basshylardy jaýapqa tartty. «Eger salynǵan nysan durys jobalanbaǵan bolsa nemese qurylys jumystary durys júrgizilmese, ony qalaı qabyldap aldyńyzdar? Endi oǵan qaıtadan jóndeý jumystaryn júrgizeıin otyrsyzdar ma? Bul salǵyrttyqtyń belgisi. Máseleni tezdetip sheshińizder. Nátıjesin maǵan jetkizińiz», - dedi Nurlan Noǵaev.
Aımaq basshysy sonymen qatar aýdandardaǵy mektepterdiń jaǵdaıyn sóz etti. Ol keıbir mektep basshylary óz jumystaryna jaýapkershilikpen qaramaıtynyna nazar aýdardy. «Áleýmettik nysan basshylary óz obektilerine uqyptylyqpen qaramaıdy. Máselen Mahambet aýylyndaǵy balabaqsha nemese Taısoıǵandaǵy mektep. Salynǵanyna 5-6 jyl ǵana bolsa da, azyp-tozyp ketken. Qaı basshy bolsa da, jaýapkershilik alyp, jumysty bar kúshin salyp isteýi kerek», - dedi ákim.
Oblys ákimi osylaısha basshylardy sheshim qabyldaýdan qashpaýǵa shaqyrdy. «Sheshim qabyldamaıtyn bolsańyzdar ol jerde nege otyrsyzdar? Olaı bolsa, jumys istemeıtin basshylardyń ornyna sheshim qabyldaýdan qoryqpaıtyn adam qoıý kerek», - dedi ákim.
Aıta keteıik, buǵan deıin Nurlan Noǵaev oblystaǵy 7 aýdan men 52 aýyldyq okrýgtiń bárin aralap shyqqan edi. Sapar barysynda ol aýdandardyń áleýmettik-ekonomıkalyq jaǵdaıymen tanysyp, halyqtyń turmysyn óz kózimen kórip shyqty.
Sapar qorytyndysy boıynsha kózdelgen 223 is-sharanyń 187-i bıyl, al 26-y 2017 jyly júzege asyrylady dep josparlanyp otyr.
