Nurlan Noǵaev polıtseılerge 50-ge jýyq kóliktiń kiltterin tabystady
ASTANA. QazAqparat - Atyraý oblysynyń ákimi Nurlan Noǵaev qoǵamdaǵy tártip pen tynyshtyqty qamtamasyz etip otyrǵan polıtseılerdi QR ishki ister organdarynyń qurylǵanyna 25 jyl tolýymen quttyqtady, dep habarlaıdy QazAqparat.
Merekege oraı uıymdastyrylǵan sharaǵa ishki ister organy qyzmetkerleri men sala ardagerleri qatysty.
" Elbasynyń sarabdal saıasatynyń nátıjesinde elimiz álemdik qaýymdastyqta óziniń aıshyqty ornyn alyp otyr. 25 jyl ishinde Qazaqstanǵa, óńirge ǵana emes, búkil álemge yqpal etetin sheshimder qabyldandy. Polıtsııa qyzmetkerleri de táýelsizdiktiń jemisin, jeńisin qorǵap, Elbasy - QR Qarýly Kúshteriniń Joǵarǵy Bas Qolbasshy Nursultan Ábishuly Nazarbaevtyń qazaqstandyqtardyń tynyshtyǵyn saqtaý, qaýipsizdikti, tártipti qamtamasyz etý jónindegi tapsyrmalaryn abyroıly atqaryp kele jatyr", - dedi Nurlan Noǵaev.
Shara kezinde qyzmette joǵary kórsetkishterge qol jetkizgen polıtsııa qyzmetkerleri marapattaldy.
Jubaıdolla Daýeshovke - polıtsııa polkovnıgi, Andreı Karabasovqa - polıtsııa polkovnıgi, sondaı-aq Rınat Iklasov pen Raýan Qasymjanovtarǵa polıtsııa podpolkovnıgi shenderi berildi.
Jıynnan soń Atyraý oblysy ishki ister departamenti Balyq qorlaryna qylmystyq qol suǵýshylyqqa qarsy kúres jónindegi polıtsııa bóliminiń jańa ǵımaratynyń saltanatty ashylýy ótti. Munda Arnaıy daıarlyq basqarmasy da kóshirilgen.
Jańa ǵımaratty oblys ákimi Nurlan Noǵaev aralap shyqty. Munda polıtsııa qyzmetkerleriniń oqý jattyǵýy úshin de bar jaǵdaı jasalǵan.
Shara aıasynda jergilikti polıtsııa qyzmetine 50-ge jýyq avtokóliktiń kiltteri tabys etildi.
