Nurlan Noǵaev órtengen teatrdy qysqa deıin qalpyna keltirýdi tapsyrdy
Drama teatryn qalpyna keltirý jumystary órtten keıin jedel túrde bastaldy. Qazir nysanda 22 kompanııa jumys istep jatyr. Olar teatrdy óz qarajatymyzǵa jóndeımiz dep bastama kótergen bolatyn.
«Qazir teatr ǵımaratynyń shatyry, elektr jelileri men syrtqy qasbetin qalpyna keltirý, ishki árleý jumystary júrip jatyr. Sonymen qatar, 12 arnaıy tehnıka tartylyp, 200-den astam adam eńbek etýde. Teatr ujymy da tys qalmaı, qalpyna keltirý jumystaryna belsendi atsalysyp júr»,- deıdi Atyraý oblystyq qurylys basqarmasynyń basshysy Málik Amanov.
Teatr ǵımaratyn aralap shyqqan aımaq basshysy Nurlan Noǵaev órtke sebepker bolǵan elektr tustamany kúrdeli jóndeý kezinde jańartpaǵan teatr basshylyǵyn synǵa aldy. Oblys ákimi jaǵdaıdy jan-jaqty saralap, kinálilerge shara qoldanýdy tapsyrdy.
Teatr ǵımaraty jańartylyp, bıyl mamyr aıynda ǵana ashylǵan bolatyn. Qalpyna keltirý jumystary barysynda sahna jóndelip, kreslolar men akýstıkalyq jabyn almastyryldy, kórermen zalyn jaryqtandyrý tehnıkasy jańardy.
«Bul - búkil oblys halqy úshin úlken syn boldy. Biraq adamdardyń nemquraıdylyǵynan qalpyna keltirý jumystary órtten keıin biraz ýaqyt ótkende ǵana bastaldy. Kóp jumys isteý kerek, degenmen, asyǵystyqqa jol berýge de bolmaıdy. Qys túskenshe ýaqytymyz bar. Mamandardyń baǵalaýynsha, úsh aı ishinde jumysty tolyǵymen aıaqtaımyz», - dedi Nurlan Noǵaev.
