Nurlan Noǵaev OPEK+ elderimen munaı baǵasyn turaqtandyrý sharalaryn talqylady

VENA. QazAqparat - QR Energetıka mınıstri Nurlan Noǵaev bastaǵan qazaqstandyq delegatsııa Avstrııada ótken OPEK+ birlesken mınıstrlik monıtorıng komıtetiniń 18-otyrysyna qatysty, dep habarlaıdy QazAqparat tilshisi.

Energetıka mınıstrligi baspasóz qyzmetiniń málimetinshe, onda álemdik munaı naryǵyn turaqtandyrý jóninde tıisti usynystar qaraldy. Sonymen qatar qazaqstandyq delegatsııa OPEK-ke múshe elder men múshe emes memleketterdiń segizinshi mınıstrlik kezdesýine qatysty. Májiliske qatysýshylar álemdik munaı naryǵyn turaqtandyrýǵa baǵyttalǵan birlesken sharalardy talqylady. Otyrys qorytyndysy boıynsha kelisimge qatysýshylar ózara tıimdi áriptestik boıynsha keńes berýdi ary qaraı da jalǵastyrý jóninde sheshim qabyldady.

«Sonymen qatar sapar barysynda N.Noǵaev Atom energııasy jónindegi halyqaralyq agenttiktiń bas dırektory R.Grossımen kezdesti. Taraptar QR men AEHA arasyndaǵy seriktestiktiń mańyzdy máselelerin talqylady, onyń ishinde AEHA-nyń tómen baıytylǵan ýran Bankin paıdalaný máselesi de bar», - dep atap ótedi mınıstrlikten.

Eske sala ketsek, qazirgi OPEK+ kelisimi boıynsha OPEK+ elderinde bıylǵy birinshi toqsannyń sońyna deıin munaı óndirýdiń jalpy kólemin táýligine 1,7 mln barrelge azaıtý uıǵarylǵan. Bul rette 2018 jyldyń jeltoqsan aıynda qabyldanǵan qoldanystaǵy kelisim aıasynda Qazaqstannyń munaı óndirý boıynsha mindettemesi táýligine 1,843 mln barrel bolyp otyr.

Aıta ketý kerek, osy kelisimniń (2019 jyl qańtar – 2020 jyl qańtar) 13 aıynyń qorytyndysyna sáıkes, Qazaqstan ózine júktelgen mindettemeni oryndady.