Nurlan Noǵaev: Memqyzmetkerler óz bilimine ǵana senýi kerek

ATYRAÝ. QazAqparat - Nurlan Noǵaev «Memlekettik ákimshilik qyzmetke alǵash kirgen memlekettik qyzmetshilerdi qaıta daıarlaý» kýrsynyń tyńdaýshylarymen  erkin suhbat  ótkizdi, dep habarlaıdy QazAqparat Atyraý oblysynyń Óńirlik kommýnıkatsııalar qyzmetine silteme jasap.

Kezdesý maqsaty - memlekettik qyzmettegi jáne ómirlik tájirıbemen bólisý, pikir almasý, jas memlekettik qyzmetshilerge kásibı baǵyt baǵdar berý, jas memlekettik qyzmet mektebiniń  úmitkerlerine memlekettik qyzmettiń qoǵamda alar róli týraly túsinikterin keńeıtý.

Oblys basshysy jas memlekettik qyzmetkerlerge óziniń ómiri, eńbek joly, basshylyq qyzmetke qalaı  kelgeni týraly baıandap, olardy qyzyqtyrǵan suraqtarǵa jaýap berdi.  

- Memlekettik qyzmet eń aldymen úlken jaýapkershilikti talap etedi. Jaýapkershilikti tik moıynmen kótere  bilý kerek. Ahmet Baıtursynov aıtqandaı, elge qyzmet etý, jerge qyzmet etý ol bilimnen emes - minezden. Sondyqtan, minez qalyptastyra bilý kerek. Minez qalyptastyrý meniń bilýimshe, ustamdylyq, tyńdaı bilý, saralaı bilý. Memlekettik qyzmetke jańadan aıaq basqan qyzmetkerlerge tolaǵaı tabystar men bıik belesterdi baǵyndyrýlaryn tileımin, - dedi Nurlan Noǵaev.

Sharaǵa 50-ge jýyq memlekettik qyzmetker qatysty. Aıta keteıik, búgingi tańda oblysta 3000-nan asa memlekettik qyzmetker eńbek etedi.