Nurlan Noǵaev: Mekteppen qoshtasý qaltaǵa salmaq salmaýy kerek
ASTANA. QazAqparat - Sońǵy qońyraýdy keń kólemde atap ótýdiń qajeti joq. Aımaqtaǵy bilim berý salasy basshylarymen ótken jınalysta Atyraý oblysynyń ákimi Nurlan Noǵaev osyndaı oı aıtty, dep habarlaıdy QazAqparat.
«Jaqynda kezekti oqý jyly aıaqtalady. Ár jyl saıyn sońǵy qońyraý saltanatyn uıymdastyrý taqyryby kóteriledi. Árıne, kez kelgen ata-ana, oqýshylar da bul merekeli kúndi joǵary deńgeıde ótkizgisi keletinin túsinemiz. Tipti keıbir ata-analar osy sharalardy ótkizýge nesıe alady eken, - dedi Nurlan Noǵaev. - Kerek qajettilikterdi satyp alýǵa, sońǵy qońyraýdy meıramhanalarda atap ótýge qansha qarajat shyǵyn bolady?!»
Oblys ákiminiń pikirinshe, saltanatty sharany qarapaıym túrde ótkizýge de bolady. Odan esh nárse mańyzyn joımaıdy. Ata-analaryna ókpelep jatatyn keıbir balalarǵa osyny durystap túsindirý kerek.
«Muǵalimderge syılyq satyp alýdyń qajettiligi joq. Qaıta muǵalimder men mektep basshylary oqýshylarmen, ata-analarmen áńgimelesýleri tıis, - dep esepteıdi aımaq basshysy. - Árıne, bul dástúr burynnan bar, biraq barlyq otbasynyń áleýmettik jaǵdaıy birdeı emes. Biz mekteppen qoshtasý - ómir jolynyń bastaýy ekenin túsindirýimiz kerek. Alda mektep túlekterin az qıyndyq kútip turǵan joq. Mine, osy jaıly oılanǵan jón. Aldymen balalarymyzdyń qaýipsizdigine mán bereıik».
Oblys ákimi bilim berý salasy basshylaryna synyptardy jóndeýge aqsha jınaýǵa qatysty jaýapkershilikti eskertti. Jergilikti bıýdjette bul maqsatqa qaralǵan qarajat jetkilikti.
«Jyl saıyn mektepterdiń aǵymdaǵy jóndeýine qarjy bólemiz, ótken jyly osy maqsatqa 116 mln teńge bólindi. Bıyl 135 mln teńge bóldi. Qarajat ár oqý ornyna jeke jiberiledi. Osy jetkilikti, ata-analardan aqsha jınaýǵa qajettilik joq, - dep atap ótti Nurlan Noǵaev. - Mektep dırektorlary men bilim berý salasynyń jaýapty tulǵalary zańsyz aqsha jınaǵany úshin jaýapkershilikke tartylady».
Jınalysta bıyl oblystaǵy úzdik mektep túlekterine resmı qurmet kórsetý saltanaty 15 maýsym kúni oblystyq ákimdik ǵımaratynyń aldynda bolatyny aıtyldy.
