Nurlan Noǵaev: Medıtsına qyzmetkerleri mindetti túrde baspanamen qamtylýy kerek
ATYRAÝ. QazAqparat - Atyraý oblysynyń ákimi Nurlan Noǵaev Inder aýdanyna issapar barysynda birqatar nysandardy aralady, dep xabarlaıdy QazAqparat.
Aımaq basshysy aldymen Inderbor kentindegi 60 páterlik turǵyn úıge bardy. NKOK kompanııasynyń demeýshiligi esebinen salynǵan nysan 2017 jyldyń jeltoqsan aıynda paıdalanýǵa berildi.
Odan keıin Nurlan Noǵaev «Inder aýdandyq bilim bóliminiń oqýshylar shyǵarmashylyq ortalyǵy" KMM-men tanysty. 2014 jyldan bastap oqýshylar shyǵarmashylyǵy bolyp jumysyn bastaǵan mekemede búginde 19 muǵalim jumys istep, 19 úıirmede 683 oqýshy tálim alady.
Sondaı-aq, sapar barysynda aımaq basshysy Esbol aýylyndaǵy qurylysy júrip jatqan 300 oryndyq mádenıet úıimen tanysty. Qazirgi kezde ǵımarat qurylysy aıaqtalǵanmen qurylys kezinde ketken kemshilikterdi joıý jumystary júrgizilýde.
Sonymen qatar, oblys basshysy Esbol aýylyndaǵy mal molasyna bardy. 2017 jyly jeltoqsan aıynda qurylysy aıaqtalǵan jańa tıptik úlgidegi mal molasy tıisti zańdylyqqa saı eldi mekennen 1700 m qashyqtyqta ornalasqan. Syrty qorshalǵan. Arnaıy adamdar kiretin esigi, avtokóliker kiretin qaqpasy bar.
Nysanmen tanysqan aımaq basshysy oblystyń barlyq aýdandarynda atalǵan nysannyń bolýy kerektigin eskertti.
"Bul másele áli de ózekti. Barlyq aýdandarda bul nysan bolýy kerek. Aýdandardyń mal molalarymen tolyq qamtylýyn qatań tapsyramyn", - dedi oblys ákimi.
Esbol aýylynan keıin oblys ákimi Kóktoǵaı aýylyndaǵy dárigerlik ambýlatorııasynda boldy.
1 dáriger, 14 orta býyn qyzmetkerleri búginde 6752 adamdy qabyldaı alady. Oblys ákimi nysanmen tanysa júrip qajet bolsa aýylǵa mamandar shaqyryp, barlyq jaǵdaı jasaýdy tapsyrdy.
"Medıtsına salasyna maman tapshy bolsa aldyrtaıyq. Jáne olar mindetti túrde baspanamen qamtamasyz etilýi kerek. Jergilikti bılik medıtsına mamandaryna barlyq jaǵdaıdy jasaýǵa daıyn",- dep atap ótti aımaq basshysy.
Sonymen qatar, memlekettik-jekeshelik áriptestik boıynsha salynǵan qyzmettik páterlerdi kórdi. Qazirgi tańda bul úıde polıtsııa qyzmetkeri, sport jattyqtyrýshysy jáne memlekettik qyzmetshiler turady. Aıta keteıik, Inder aýdany boıynsha búgingi tańda 2 páterlik 28 úı qajetti mamandarǵa paıdalanýǵa berilgen.
Keıin, Kóktoǵaı aýylyndaǵy apatty jaǵdaıdaǵy ınternat, eski dárigerlik ambýlatorııa ǵımaratynyń jaı-kúıin kórdi. Aldaǵy ýaqytta ǵımarattardy buzyp ornyna jańa ǵımarattardy salý josparlanýda.
Sondaı-aq, aımaq basshysy "Qulynshaq" sharýa qojalyǵynda boldy. Sharýa qojalyqtyń jumysymen tanysyp asyl tuqymdy mal ósiretin sharýa qojalyqtyń qyzmetkerlerine aldaǵy jumystaryna sáttilik tiledi.
Atyraý oblysynyń ákimi Nurlan Noǵaev Inder aýdanyndaǵy issapar kezinde «Nur Otan» partııasy Inder aýdandyq fılıaly ǵımaratynda qoǵamdyq qabyldaý ótkizip, artynda aýdan ardagerlerimen kezdesti.
