Nurlan Noǵaev mańǵystaýlyqtarǵa taǵy da úndeý jasady
«Qurmetti mańǵystaýlyqtar! Sońǵy kúnderi Jańaózen qalasyndaǵy birneshe kásiporyn jumysyn toqtatty. Jumysshylardyń bir bóligi jumys berýshilerge jalaqyny kóterý máselesin qoıyp otyr. Qazirgi ýaqytta Jańaózen qalasynda «Qazmunaıgaz» kompanııasynyń basshysy Alık Aıdarbaev jumys istep jatyr. Ol eńbek ujymdarymen kezdesip, qalyptasqan jaǵdaıdy jáne olardy sheshý jónindegi qolǵa alynyp jatqan sharalardy túsindirýde. Sondaı-aq, Jańaózen qalasynda jumyssyz azamattardy jumysqa ornalastyrý boıynsha osymen ekinshi apta qatarynan oblys ákiminiń birinshi orynbasary Abzal Meńdibaev bastaǵan arnaıy komıssııa jumys júrgizip jatyr. Bul suraqtarda alǵa ilgerileýshilik bar», - dep atap ótedi óńir ákimi.
Oblys basshysy óńirlegi problemalardy sheshý úshin júıeli jumystar júrgizilip jatqanyn da atap ótedi.
«Men barlyǵyn jaqsy túsinemin. Problemalar bar. Olardy sheshý úshin biz barlyq múddeli taraptarmen júıeli túrde jumys isteýimiz kerek. Qansha qalasaq ta óńirdiń barlyq turǵyndaryn bir mezette munaı-gaz salasyna jumysqa ornalastyrý múmkin emes. Biraq biz shaǵyn jáne orta bıznes kásiporyndarynda, basqa da memlekettik jáne basqa kásiporyndarynda jańa jumys oryndaryn quryp, óńir ekonomıkasyn ártaraptandyrýǵa tıispiz. Halyqtyń jáne eldiń amandyǵy úshin barshańyzdy sabyr saqtaýǵa jáne túsinistik tanytýǵa shaqyramyn. Kóterilgen máseleler sheshiledi. Biraq birden emes. Ol úshin ýaqyt qajet», - dedi ol.
Nurlan Noǵaevtyń atap ótýinshe, qysqa merzimde «Ózenmunaıgaz» aktsıonerlik qoǵamy Jańaózen qalasynyń 150 jumyssyz azamatyn jumysqa ornalastyrýy kerek. Taǵy 150 turǵyndy servıstik mekemelerge jumysqa qabyldaýdy josparlap otyr.
«Men mekeme jumysshylaryn jáne kásipodaq uıymdaryn jumysberýshimen konstrýktıvti dıalog qurýǵa shaqyramyn. Elimizdiń Prezıdenti Qasym-Jomart Kemeluly Toqaev birneshe ret atap ótkendeı, bizge qordalanǵan máselelerdi ústel basynda sheshý kerek. Mańǵystaý oblysynyń ákimdigi «QazMunaıGaz» ulttyq kompanııasynyń basshylyǵymen, basqa da memlekettik organdarmen birlesip, jaǵdaıdy erekshe baqylaýda ustap otyr. Sondaı-aq, Jańaózen qalasyndaǵy shaǵyn jáne orta bıznes sýbektileri qosymsha taǵy 50 jańa jumys ornyn ashady. Osylaısha, arnaıy ázirlengen algorıtm negizinde Jańaózen qalasynyń jumyssyz azamattary kezek-kezegimen jumysqa ornalastyrylatyn bolady. Bul – ýaqyttyń enshisindegi másele. Biz jumysqa ornalastyrýdyń osy algorıtminiń ashyqtyǵy men adaldyǵyna kepildik beremiz. Jańaózen qalasynyń turǵyndary da komıssııa quramynda bar», - dedi Nurlan Noǵaev.
Sonymen qatar ol mańǵystaýlyqtardy arandatýshylyqqa boı aldyrmaýǵa shaqyrdy.
«Óńir basshysy retinde, ári osy oblystyń janashyr turǵyny retinde, arandatýshylyqqa boı aldyrmaýdy jáne popýlıstik urandar men bos ýádelerge aldanyp qalmaýlaryńyzdy suraımyn. Biz barlyq qıyndyqty birge jeńemiz! Sizderdi aqylmen sheshim qabyldap, ádildik tanytady dep senemin!», - dedi oblys ákimi.
