Nurlan Noǵaev Mańǵystaýdaǵy jumyssyzdyqqa qatysty: Qyzmetin asyra paıdalanatyndar bar

NUR-SULTAN. QazAqparat – Mańǵystaý oblysynyń ákimi Nurlan Noǵaev óńirdegi halyqty eńbekpen qamtý máselesine qatysty túsinik berdi, dep habarlaıdy QazAqparat tilshisi.

«Iá, óńirde jumyssyzdyq máselesiniń bary ras. Biraq, másele memlekettik baǵdarlamalardyń aıasynda sheshimin taýyp jatyr. Sol sııaqty barlyq mańǵystaýlyqtardy nemese jańaózendikterdi munaı-gaz salasyna jumysqa kirgizý múmkin emes. Kezinde oblys ákimdigi, «QazMunaıGaz» AQ jáne jergilikti munaı-gaz óńdeý kompanııalarymen birlesip bos jumys ornyna qabyldaýdyń algorıtmi ázirlenip, qabyldandy. Ýaqyt óte kele ol algorıtm óziniń tıimdiligin kórsetti. Biz sol baǵyttaǵy jumysty jalǵastyratyn bolamyz», - dedi Nurlan Noǵaev onlaın ótken baspasóz máslıhatynda.

Sondaı-aq, oblys basshysy óńirde jumysqa ornalasý boıynsha problemanyń baryn aıtty.

«Keıde bos jumysqa ornalasý ashyq túrde ótpeı jatady. Nemese jaýapty tulǵalardyń qyzmetin asyra siltep paıdalanyp jatatyn sátter de bar. Sondyqtan biz joǵaryda atalǵan jumysqa turý algorıtmin qaıta qarap, máseleni nazarda ustaımyz. Solaısha jumysqa ornalasýda ashyqtyqty qamtamasyz etpekpiz», - deıdi ol.

Mańǵystaý ákiminiń aıtýynsha, aldymen eńbekpen qamtý ortalyǵynda resmı tirkelgen azamattar jumyspen qamtylady.

Buǵan deıin óńir basshysy Mańǵystaýda jyl saıyn 1 myń adamnyń jumyspen qamtylatynyn aıtqan edi.