Nurlan Noǵaev Mańǵystaýda balyq sharýashylyǵyn damytý baǵdarlamasyn ázirleýdi tapsyrdy

NUR-SULTAN. QazAqparat – Mańǵystaý oblysynyń ákimi Nurlan Noǵaev Túpqaraǵan aýdanyna eki kúndik jumys sapary aıasynda balyq sharýashylyǵyn damytýǵa arnalǵan kóshpeli jıyn ótkizdi, dep habarlaıdy QazAqparat Mańǵystaý oblysy ákiminiń baspasóz qyzmetine siltememen.

Jıyn barysynda janýarlar dúnıesin paıdalanýǵa ruqsat alý, ashyq teńizge shyǵý úshin shekaralyq ótkizý qujatyn alý, táýlik boıy balyq aýlaýǵa jáne kásipshilik balyq aýlaý normatıvterin shekteý máseleleri kóterildi.

Nurlan Noǵaev Mańǵystaý oblysynyń jańadan ashylǵan balyq sharýashylyǵy basqarmasynyń basshysyn tanystyrdy. Jańa qyzmetke «Jaıyq-Kaspıı oblysaralyq basseındik balyq sharýashylyǵy ınspektsııasy» RMM eks basshysy Arman Moldashev taǵaıyndaldy.

Salanyń ózekti máselelerin talqylaǵan jıynda Nurlan Noǵaev jaýapty tulǵalarǵa óńirde balyq sharýashylyǵyn damytý baǵdarlamasyn ázirleýdi tapsyrdy.

«Aımaqta balyq sharýashylyǵyn damytý úshin biz osy máselemen ǵana aınalysatyn jańa basqarma ashtyq. Osy salada kóp jyldyq tájirıbesi bar basqarmanyń basshysy Arman Moldashevke birqatar naqty tapsyrmalar da berildi. Endi balyq sharýashylyǵyn damytý máselesi turaqty baqylaýda bolady», - dedi Nurlan Noǵaev.