Nurlan Noǵaev: Maqsat - týberkýlez aýrýy boıynsha nóldik kórsetkishke qol jetkizý
ATYRAÝ. QazAqparat - Qurmanǵazy aýdanyna jumys saparymen barǵan Atyraý oblysynyń ákimi Nurlan Noǵaev birqatar áleýmettik nysandardyń jumystarymen tanysty, dep habarlaıdy óńir basshysynyń baspasóz qyzmeti.
Aımaq basshysy aldymen Ganıýshkıno selosyndaǵy týberkýlezben aýyratyndarǵa arnalǵan shıpajaıǵa bardy. Buryn týberkýlez aýrýhanasy bolǵan bul ǵımarat birneshe jyldan beri bos turǵan edi. Shıpajaı qazirgi zamanǵy talapqa saı bolmaǵandyqtan, sońǵy standarttar boıynsha jabdyqtalǵan jańartylǵan ǵımarat salý týraly sheshim qabyldanǵan. Oblys ákimi osyndaı medıtsınalyq nysandar qurylysyn basqa aýdandardan da júrgizý máselesin qarastyrý týraly tapsyrma berdi.
-Biz bul aýrýdy jeńý úshin barlyq jaǵdaıdy jasaýymyz kerek. Bul aqsha sanap otyratyn másele emes. Qansha qajet, sonsha bólemiz. Týberkýlez - áleýmettik aýrý, onymen kúresý kerek. Bizdiń maqsat - aýrýshańdyq boıynsha nóldik kórsetkishke qol jetkizý, - dedi Atyraý oblysynyń ákimi Nurlan Noǵaev.
Oblystyq densaýlyq saqtaý basqarmasynyń basshysy Mánshúk Aımurzıevanyń aıtýynsha, munda saýyǵýǵa, ımmýnıtetti kóterýge, aýrý sanyn azaıtýǵa qajetti barlyq jaǵdaı jasalady.
Aıta ketý kerek, Qurmanǵazy aýdanynda Atyraý oblysyndaǵy tirek-qozǵalys apparaty buzylǵan balalarǵa arnalǵan jalǵyz memlekettik ońaltý ortalyǵy jumys isteıdi. Qazir munda 20 bala em qabyldaýda. Ortalyqtyń jumysymen tanysyp, mamandarmen sóılesken Nurlan Noǵaev osy salada jeke bıznespen seriktestikte jumysty uıymdastyrýdy tapsyrdy. Aımaq basshysy mundaı ortalyqtardy memleket qamtamasyz etetinin aıtty.
-Kásipkerler osyndaı ortalyqtar salýlary kerek, biz óz tarapymyzdan memlekettik tapsyryspen qamtımyz. Erekshe balalar ǵana emes, basqa sanattaǵy azamattar da, mysaly júregi aýyratyndar da saýyqtyrý sharalaryn alǵylary keledi, - dedi Nurlan Noǵaev.
