Nurlan Noǵaev qurylys nysandaryn kúndelikti baqylap otyrýdy tapsyrdy

ATYRAÝ. QazAqparat - Atyraý oblysynyń ákimi Nurlan Noǵaev Isataı aýdanyna jumys sapary barysynda bıýdjet qarajaty esebinen qarjylandyrylatyn qurylys nysandaryn tehnıkalyq qadaǵalaýǵa qatysty eskertýler aıtty, dep habarlaıdy QazAqparat tilshisi. 

Oblystyq ákimdiktiń baspasóz qyzmetiniń habarlaýynsha, jumys sapary barysynda aımaq basshysy Isataı aýdany Zıneden aýylyndaǵy Kaspıı teńizi jaǵalaýynda salynatyn 500 oryndyq oqý-saýyqtyrý lageriniń qurylysymen tanysqan. Lager qurylysy, atalǵan orynǵa ınjenerlik-kommýnıkatsııalyq ınfraqurylym júrgizý shaǵyn jáne orta bıznes sýbektilerine jańa demalys oryndaryn ashýǵa múmkindik beredi, ol óz kezeginde jańa jumys oryndaryn ashýǵa, ShOB sýbektilerin kóbeıtýge, ishki jáne syrtqy týrızmdi damytýǵa yqpal etedi. Qazir saýyqtyrý lageriniń jobalyq-smetalyq qujattamasy saraptamadan ótip jatyr.

  Aımaq basshysy, sondaı-aq, Zıneden aýylyndaǵy 100 oryndyq balabaqsha, Kadyrka aýylyndaǵy 60 páterlik turǵyn úı jáne Qurmanǵazy aýdany ortalyǵyndaǵy 75 oryndyq aýrýhana qurylystaryn aralap shyqty.

Kúndelikti tehnıkalyq qadaǵalaýdyń joqtyǵy aımaq basshysynyń narazylyǵyn týdyrdy. Belgili bolǵandaı, qurylys sapasyna baqylaý júrgizýge jaýapty mamandar keıbir jumys túrlerin nysan basyna barmaı, qashyqtan qabyldap kelgen.

«Bul - jaýapty tulǵalardyń qateligi, tehnıkalyq qadaǵalaý kún saıyn bolýy kerek. Tehnıkalyq qadaǵalaý mamandarynyń qorytyndysy boıynsha tapsyrys berýshiler nysandy balanstaryna qabyldaıdy, al kúndelikti qadaǵalaýdyń bolmaýynyń saldarynan qurylys protsesinde kemshilikter bolýy múmkin. Keıin solardy joıý qajettiligi týyndap, qosymsha bıýdjet qarajaty jumsalady. Tehnıkalyq qadaǵalaý mamandary nysanda kún saıyn bolyp, barlyq jasalǵan jumys sapasyn baqylaýlary kerek. Biz bizdiń talabymyz jáne onyń oryndalýyn baqylaýda ustaımyz», - dedi Nurlan Noǵaev. 

Nurlan Noǵaev qurylys nysandaryna aýyl-aımaqtaǵy jumyssyz turǵyndardy tartý jumyssyzdyqty azaıtýǵa septigin tıgizetinin aıtty.

«Jergilikti atqarýshy organdardyń qyzmetkerleri óz aýyldaryndaǵy jumyssyz adamdardy jumysqa ornalastyrýǵa kúsh salǵandary durys. Ol úshin qajet jaǵdaıdyń bári bizde bar, solardy tıimdi paıdalanýǵa tıispiz»,-dedi N. Noǵaev.

Oblys ákimi Isataı aýdanyndaǵy aýylishilik joldar qurylysyn da tekserdi. Aıta keteıik, 2018 jyly Atyraý oblysynda 280 shaqyrym jol qurylysy josparlanǵan, onyń 220-sy - oblys ortalyǵynda, qalǵany - aýdandarda.