Nurlan Noǵaev qalalyq bılikke pandýstar sanyn kóbeıtýdi tapsyrdy
ATYRAÝ. QazAqparat - Atyraý oblysynyń ákimi Nurlan Noǵaev qalalyq ákimdikke oblys ortalyǵynda pandýstar sanyn kóbeıtýdi tapsyrdy, dep habarlaıdy «QazAqparat» HAA tilshisi.
«Múmkindigi shekteýli tulǵalar barlyq uıymdarǵa, mekemeler men shaǵyn jáne orta bıznes nysandaryna kedergisiz kirip-shyǵýy tıis. Biz múmkindigi shekteýli azamattarǵa shashtarazdar, dúkender, demalys oryndaryna qojetimdi bolýyna jaǵdaı jasap, osy baǵyttarda kezdesetin kedergilerdi joıýymyz kerek. Biz ómir súretin qoǵam barlyq sanattaǵy azamattarǵa qolaıly bolýy úshin jumys jasaýymyz kerek. Jaǵdaıdy túzeýge ýaqyt beremin. Eger oń sheshimin tappasa, jaýapty tulǵalar jaýap berýlerine týra keledi», - dedi óńir ákimi.
Aıta keteıik, oblysta jalpy 766 pandýs bar. Ol qajettilikti tolyq ótemeıdi, qazirgi kezde oblysqa keminde 1400 pandýs qajet.
