Nurlan Noǵaev ınvestıtsııalyq jobalarǵa baqylaýdy kúsheıtýdi tapsyrdy
ATYRAÝ. QazAqparat - Atyraý oblysynyń ákimi Nurlan Noǵaev «Atyraý» ÁKK dırektorlar keńesiniń jınalysyna qatysyp, aımaqta júzege asyp jatqan ınvestıtsııalyq jobalarǵa baqylaýdy kúsheıtýdi tapsyrdy. Bul týraly QazAqparat óńirlik kommýnıkatsııalar qyzmetine silteme jasap habarlaıdy.
Aımaq basshysy Nurlan Noǵaev «Atyraý» ÁKK UK» AQ basshylyq quramymen jumys májilisin ótkizdi. Kezdesý barysynda oblys ákimine áleýmettik-kásipkerlik korporatsııasynyń jumysy tanystyrylyp, ınvestıtsııalyq jobalardy júzege asyrý jospary aıtyldy.
Korporatsııa qurylǵan 2010 jyldan beri mekeme kirisi 6,7 mlrd teńgege jetken. «Atyraý» ÁKK UK» AQ basshysy Marat Túsipqalıevtiń aıtýynsha, 8 jylda 20 iri joba júzege asqan.
«Olar taýarly sút fermasy, jún óńdeý zaýyty, kókónis óńdeý tsehy, qoıma jaılary, basqa da óndiristik ortalyqtarsyndy iri mekemeler. Biraq keıbir kásipkerler korporatsııadan berilgen qarajatty qaıtarýǵa asyqpaı otyr. Munyń ár túrli sebepteri bar. Biz kásipkerge bıznesin damytýǵa qajet qolaıly jaǵdaı jasaýǵa tyrysyp keldik, alaıda keıbir qaryz alýshylardyń jaýapkershilikke yqylassyz qaraýy nátıjesinde bıýdjet qarajatynyń ýaqtyly qaıtarylmaý derekteri tirkelip otyr. Bul óz kezeginde bizdiń quzyrly organdarǵa júginýimizge, qaryz alýshyǵa qatysty shara qoldanýymyzǵa májbúr etýde», -dedi Marat Túsipqalıev.
Sonymen qatar, jıyn barysynda Nurlan Noǵaev dırektorlar keńesine ınvestıtsııalyq portfelge baqylaýdy kúsheıtip, qarjylandyrylǵan sýbektilerdiń qyzmetine belsendi qatysýdy tapsyrdy.
«Bizdiń mindetimiz qur aqsha bólip otyrý emes, qarajattyń maqsatty jumsalýyn qadaǵalaý kerekpiz. Kásipkerge negizgi máseleler boıynsha kómek kórsetilip, keńes berý kerek. Bul iske jergilikti atqarýshy organdardyń ókilderi- barlyq deńgeıdegi ákimder, oblys ákiminiń orynbasarlary, basqarma basshylary men bólim jetekshileri jumylýlary kerek, -dedi aımaq basshysy.
Sonymen qatar, ÁKK ınvestıtsııalaıtyn jobalar aımaq úshin óte qajet - jumys oryndary qurylady, oblystyń aýyl sharýashylyǵynan bastap qurylysqa deıingi ártúrli salalarynyń damýyna oń yqpal etedi. Qaryz qarajatynyń qaıtarylýyna baqylaýda únemi nazarda bolýy tıis. Mundaı operatsııalar kezinde memlekettiń mindeti- bıznestiń damýyna ınvestıtsııa arqyly serpin berý, qarajat qaıtarylǵannan keıin ony oblysqa qajet basqa mekemege salý kerek.
Aıta keteıik, qazir «Atyraý» ÁKK aımaqtyń áleýmettik salasynda 17 ınvestıtsııalyq jobany júzege asyrýda.
