Nurlan Noǵaev: Balalar bolashaǵyn munaı-gaz salasymen baılanystyrý durys emes

MAŃǴYSTAÝ OBLYSY. QazAqparat – Mańǵystaý oblysynyń ákimi Nurlan Noǵaev Jańaózen qalasyna barǵan jumys saparynyń ekinshi kúni Rahat, Teńge aýyldaryndaǵy birqatar áleýmettik nysandy aralap, eki eldi mekenniń turǵyndarymen kezdesti. Bul týraly óńir basshysynyń baspasóz qyzmetinen málim etti, dep habarlaıdy QazAqparat tilshisi

Aımaq basshysynyń Teńge aýylynyń turǵyndarymen kezdesýinde aýyl ákimi Sársenbek Qalaýbaev jyl boıy atqarylǵan jumystar týraly esep berip, 2022 jylǵa arnalǵan josparlarymen bólisti. Óz kezeginde oblys ákimi Nurlan Noǵaev jınalǵandardy óńirde júrgizilip jatqan jumystar týraly habardar etip, suraqtaryna jaýap berdi, usynystaryn tyńdady.

Kezdesýde halyq áleýmettik sala, jumyspen qamtý, mal sharýashylyǵy, jer telimderin alý, kóshelerge asfalt salý, densaýlyq saqtaý jáne kommýnaldyq qyzmetterdiń quny máselelerin kóterdi.

Óńir basshysy barlyq aıtylǵan máseleler mańyzdylyǵyna qaraı júıeli túrde sheshiletinin atap ótti. Sondaı-aq, ata-analardy bolashaqta balalaryn suranysqa ıe mamandyqtardy tańdaýyna kómektesýge shaqyrdy.

«Biz qazirgi ýaqytta bolashaqty munaı-gaz salasymen ǵana baılanystyrý durys emes ekenin túsinýimiz kerek. Perspektıvaly salalar bar. Ol aýyl sharýashylyǵy, teńiz isi, IT mamany. Óskeleń urpaqqa munaı salasynan bólek jeke áleýeti men darynyn ashýyna múmkindik berýimiz kerek. Sonda ǵana bizdiń balalar básekege qabiletti bolady», - dedi Nurlan Noǵaev.

Búginde Teńge aýylynda 17700 adam turady. Aýylda barlyǵy 3500 oryndyq 3 orta mektep jáne 2 mektepke deıingi bilim beretin balabaqsha jumys isteıdi. Sonymen qatar, aýylda alǵashqy medıtsınalyq-sanıtarlyq kómek ortalyǵy, dárigerlik ambýlatorııa, Jańaózen qalasynyń qalalyq jedel járdem bóliminiń janynda Teńge aýylynyń bólimshesi jumys isteıdi. Shaǵyn bıznestiń 84 sýbektisi bar. Aýyl aýyz sýmen, gazben jáne elektr energııasymen tolyq qamtamasyz etilgen.

Budan keıin Nurlan Noǵaev Rahat aýylynyń turǵyndarymen kezdesip, aýyl ákimi Óserbaı Tabynshaevtyń jyldyq esebin tyńdady. Rahat aýylynyń turǵyndary aýyz sý, jumyspen qamtý, aýyldy abattandyrý jáne kógaldandyrý máselelerin kóterdi. Óz kezeginde óńir basshysy Nurlan Noǵaev jınalǵandardy oblysta júrgizilip jatqan jumystar týraly habardar etip, olardyń suraqtaryna jaýap berdi.

Esep berý kezdesýlerinen keıin oblys ákimi Teńge jáne Rahat aýyldarynda azamattardy jeke máselelerimen qabyldady. Búginde Rahat aýylynyń 42 myńnan astam turǵyny bar. «Rahat», «Aqsý», «Mereı» shaǵyn aýdandarynda 7 630 turǵyn úı tirkelgen. Aýylda 3 orta mektep, 1 memlekettik jáne 7 jekemenshik balabaqsha jumys isteıdi.

Osy jyly «Rahat» shaǵynaýdany Balaýsa, Gúlder jáne Jemisti kóshelerine jalpy uzyndyǵy 3,6 shaqyrym bolatyn avtokólik joldarynyń qurylysyn júrgizý qaralǵan.