Nurlan Noǵaev atyraýlyq 97 túlekke «Altyn belgi» taqty
ATYRAÝ. QazAqparat - Atyraýda daryndy oqýshylardyń «Daryndy urpaq - el bolashaǵy» atty forýmy ótti. Osymen tórtinshi jyl qatarynan uıymdastyrylyp otyrǵan sharaǵa mektep bitirip otyrǵan úzdik oqýshylar qatysty, dep habarlaıdy oblys ákiminiń baspasóz qyzmeti.
Olar "Altyn belgileri" men erekshe úlgidegi attestattaryn oblys ákimi Nurlan Noǵaevtyń qolynan aldy. Bıyl oblysta 97 oqýshy "Altyn belgi" ıegeri atanyp, 81 túlek úzdik attestatqa qol jetkizdi.
Sharaǵa qatysqan óńir basshysy úlken ómirge aıaq basyp otyrǵan túlekterge aq jol tiledi:
«11 jyl boıy aıanbaı etilgen eńbektiń, ustazdar men ata-analardyń tárbıesiniń arqasynda júzden júırik, myńnan tulpar atandyńyzdar. Búgin sizderdi úlken ómir jolyna shyǵaryp salǵaly otyrmyz. Aq jol tileımin! Ómir dańǵyl jol emes, kedergileri de bar. Biraq áraqashan bilimderińiz ben tárbıelerińizge senip eńbek etetin bolsańyzdar, abyroıly bolasyzdar. Elbasynyń joldaýynda, strategııalyq qujatarda kórsetilgen Qazaqstannyń damý baǵytyna úles qosatyn - jas urpaq, ıaǵnı sizdersizder», - dedi oblys ákimi. 
Ol sonymen qatar, bilim berý jolynda ter tógip kele jatqan ustazdar men ata-analardyń eńbegin tilge tıek etip, olarǵa rahmet aıtty.
Aıta ketelik, bıyl oblysta 4516 oqýshy mektep bitirip otyr. Atyraý oblysy ákimi baspasóz qyzmetiniń habarlaýynsha, oqýshylardyń alańsyz bilim alýy úshin osy jyly oblysta 817 ınertaktıvtik taqta, 111 mýltımedıalyq kabınet, 89 ınformatıka kabıneti alynyp jatyr. Buǵan jergilik bıýdjetten 1 mılııard teńgeden astam qarajat bólingen. Sonymen qatar, bıyl aımaqta 14 mektep pen 11 balabaqshanyń qurylysy bastalǵan.
