Nurlan Noǵaev: Atyraý ýnıversıtetterindegi jemqorlyq meni de qynjyltady

NUR-SULTAN - ATYRAÝ. QazAqparat - Búgin Ortalyq kommýnıkatsııalar qyzmetindegi baspasóz máslıhatynda Atyraý oblysynyń ákimi Nurlan Noǵaev óńir ýnıversıtetterindegi jemqorlyq faktilerine qynjylys bildirdi, dep habarlaıdy QazAqparat tilshisi.

«Atyraýdyń eki ýnıversıtetiniń sybaılas jemqorlyq boıynsha aldyńǵy orynda turǵany, árıne qynjyltady. Bul búkil Atyraý turǵyndaryn alańdatady. Sebebi árkim óz balasynyń, urpaǵynyń laıyqty bilim alǵanyn qalaıdy», - dedi Nurlan Noǵaev BAQ ókilderiniń saýalyna oraı.

Onyń atap ótýinshe, Atyraý ýnıversıtetterin jemqorlyq jaılaǵany «Nur Otan» partııasynyń jemqorlyqqa qarsy qoǵamdyq keńesinde talqyǵa túsken.

«Degenmen, ýnıversıtet óz tarapynan biraz sharany júrgizip jatyr. Siz atap ótken derekter - «Jas Otan» jastar qanatynyń saýalnama júrgizý arqyly alǵan nátıjesi. Oǵan qatysqan 50 myń stýdent oqý ordasynda jemqorlyq bar ekenin aıtqan eken. Óz kezeginde H.Dosmuhamedov atyndaǵy Atyraý memlekettik ýnıversıteti jumysyn istep jatyr. Atap aıtqanda, rektorat oqytýshylardyń sessııada qaısysy paraǵa beıim ekenin anyqtaý úshin stýdentter arasynda saýalnama júrgizedi. Sonyń nátıjesinde yqtımal oqytýshylardy emtıhan, synaq alýǵa jibermeıdi. Bul - bir kúnde bitetin is emes. Sessııanyń tazalyǵyn, dıplom jumystarynyń ádildigin qamtamasyz etý baǵytynda ýnıversıtetterdiń óz ustanymy bar», - dedi Nurlan Noǵaev.