Nurlan Noǵaev Atyraý oblysyndaǵy balyq óńdeý zaýytynda boldy

ATYRAÝ. QazAqparat - Atyraý oblysynyń ákimi Nurlan Noǵaev Qurmanǵazy aýdanyndaǵy Shortanbaı balyq óńdeý zaýytynda boldy, dep habarlaıdy QazAqparat óńir basshysynyń baspasóz qyzmetine silteme jasap.

Isataı, Qurmanǵazy aýdandaryna jumys saparymen barǵan Nurlan Noǵaev quzyrly organdardyń zańsyz balyq aýlaýmen kúres, qurylys, sý tasqynynan qorǵaý bógetin qalpyna keltirý boıynsha qyzmetterin tekserdi.

Shortanbaı aýylyndaǵy balyq zaýyty balyq qabyldaý jáne óńdeý isimen aınalysady. Zaýytta qaqtalǵan, keptirilgen balyq, balyq ónimderi, jartylaı fabrıkattar, shortan ýyldyryǵy daıyndalady. Mekemede 180-ge jýyq adam eńbek etedi, ónimder ishki naryqtan bólek alys-jaqyn shetelge eksportqa shyǵarylady.

Aımaq basshysy mekemeni qaraý barysynda bıznes sýbektileri shyǵaratyn ónimderdiń kólemin arttyrý úshin memlekettik qoldaý sharalaryn paıdalana alatyndaryn atap ótti.

«Bizde kásipkerlerdi qoldaýǵa baǵyttalǵan sharalar, jaqsy memlekettik baǵdarlamalar bar. Memleket basshysy bıznesmenderge qolaıly jaǵdaı jasaý qajettiligine mańyz berip otyr. Memlekettik qoldaý sharalaryn paıdalana otyryp, kásipkerler shyǵaratyn ónimderiniń kólemin, sapasyn, eksporttyq áleýetin ulǵaıta alady», - dedi Nurlan Noǵaev.

Sonymen qatar oblys ákimi Isataı, Qurmanǵazy aýdandaryndaǵy zańsyz balyq aýlaýshylarǵa qarsy qoldanylatyn sharalarmen tanysty. Qurmanǵazy aýdanyndaǵy sý tasqynyna qarsy qorǵanys bógetiniń qurylysyn, qalpyna keltirý jumystaryn da nazarǵa aldy. 

Nurlan Noǵaev jumys sapary qortyndysy boıynsha jaýapty tulǵalarǵa naqty tapsyrmalar berdi.