Nurlan Noǵaev: Aldymyzdaǵy basty maqsat - el birligin qamtamasyz etý

NUR-SULTAN. QazAqparat - Qasym-Jomart Kemeluly Toqaev halqymyzdy bir maqsat, bir múddege jumyldyratynyna senimdimiz. Mundaı pikirdi «Nur Otan» partııasynyń kezekten tys HІH sezinde Atyraý oblysynyń ákimi Nurlan Noǵaev aıtty, dep habarlaıdy QazAqparat tilshisi.

«Aldymyzda turǵan endigi basty maqsat - Tuńǵysh Prezıdentimiz - Elbasy saıasatynyń altyn arqaýy, basty ózegi bolǵan el birligi men yntymaǵynyń jarasymdy jalǵasyn qamtamasyz etý. Prezıdenttik ókilettigińizdi toqtatý jónindegi sheshimińizdi atyraýlyqtar alǵashqy sátte alańdaýshylyqpen qabyldaǵany ras. Degenmen, bul sheshimniń sebebin ózińiz túsindirgen soń boıymyzdaǵy tolqý sezimi seıildi. Bul tarıhı sát elimizdiń bolashaǵyna degen ustanymyńyzdy, kóregendik kósemdigińizdi taǵy da aıshyqtady», - dedi oblys ákimi «Nur Otan» partııasynyń Tóraǵasy, Elbasy Nursultan Nazarbaevqa qarata.

Onyń atap ótýinshe, urpaqtar sabaqtastyǵy, bıliktiń ınstıtýtsıonaldyǵy men osy joldaǵy tańdaý Qasym-Jomart Toqaev myrzaǵa túskenin «Nur Otan» partııasynyń músheleri zor iltıpatpen, senimmen qabyldady.

«Qurmetti Elbasy! Qasym-Jomart Kemeluly - ózińizdiń senimdi kómekshińiz, senimdi úzeńgilesińiz. Álemdik saıasattyń aýa raıyn jaqsy túsinetin, el múddesi úshin qajet sheshim qabyldaı alatyn saıasatker retinde dúnıejúzine tanymal tulǵa ekenin ózińiz atap óttińiz. Kásibı biliktiligimen, ár saladaǵy tájirıbesimen, adaldyǵy jáne adamgershiligimen tanymal Qasym-Jomart Kemeluly Elbasymyzdyń strategııalyq bastamalaryn jalǵastyryp, halqymyzdy bir maqsat, bir múddege jumyldyra otyryp, Táýelsizdigimizdiń máńgi bolýyna, elimizdiń damýyna bar kúsh-jigerin salatynyna senimdimiz», - dedi Nurlan Noǵaev.